Маңғыстау облысында қуаттылығы 160 МВт болатын бу-газ қондырғысы салынады

Бүгін, 9 шілде күні Маңғыстау облысы әкімінің орынбасары Аббат Өрісбаев Қытайдың CHDOI компаниясының вице-президенті Чжоу Цинкемен кездесті. Басқосуда Маңғыстау атом энергетикалық комбинаты мен Қытайдың Huadian Kazakhstan Energy компаниясының бірлескен «Ақтау энергетикалық компаниясы» кәсіпорны аясында қуаттылығы 160 МВт болатын бу-газ қондырғысын салу жобасы талқыланды.

Заманауи электр станциясы газ турбиналық және бу турбиналық екі бөліктен тұрады. Жобаны іске қосу өңірдің электр энергиясына деген өсіп жатқан сұранысты қанағаттандырып, жоспарлы жөндеу жұмыстары кезінде МАЭК қуатын үздіксіз қамтамасыз етуге мүмкіндік береді.

Жобаның маңызды артықшылықтарының бірі - құрылыс жұмыстары аяқталған соң станция толығымен МАЭК басқаруына өтеді. Қазіргі таңда нысан құрылысына қажетті жер учаскесі бөлініп, жұмыстар басталып кеткен.

Кездесу барысында қытайлық компания өкілдері жобаны сәтті жүзеге асыру үшін барлық күш-жігерін салуға дайын екендіктерін жеткізді. Сондай-ақ олар жергілікті ресурстар мен жұмыс күшін барынша пайдалануға ниетті екенін атап өтті.

Өз кезегінде облыс әкімінің орынбасары Аббат Өрісбаев әкімдік тарапынан барлық қажетті қолдау көрсетілетінін айтты.
 

- Бұл жоба өңір үшін стратегиялық маңызға ие. Өйткені ол аймақтың энергетикалық қауіпсіздігін нығайтып, әлеуметтік-экономикалық дамуына тың серпін бермек. Облыс әкімі Нұрдәулет Игілікұлы бұл бастамаға жан-жақты қолдау көрсетіп отыр. Сіздердің мол тәжірибелеріңіз бар, бүгінге дейін көптеген ірі жобаларды жүзеге асырып келесіздер. Әкімдік тарапынан барлық қажетті көмек көрсетеміз. Қазіргі таңда жер бөлініп, тиісті жұмыстар басталды. Алдағы уақытта нақты нәтижелер күтеміз. Қосымша қолдау қажет болса, әрдайым бірлесе жұмыс істеуге дайынбыз, - деді Аббат Өрісбаев.

Маңғыстау облысы әкімінің баспасөз қызметі

• 09.07.2025
• 6