Нұрдәулет Қилыбай БҰҰ Балалар қорының Қазақстандағы өкілін қабылдады

Бүгін, 10 шілде күні Маңғыстау облысының әкімі Нұрдәулет Қилыбай БҰҰ Балалар қорының (ЮНИСЕФ) Қазақстан Республикасындағы өкілі доктор Рашед Мұстафа Сарвармен кездесті. Басқосуда тараптар балалардың құқықтарын қорғау, жастар саясатын дамыту, тұрақты даму және қоршаған ортаны қорғау салаларындағы ынтымақтастықтың басым бағыттарын талқылады.

Доктор Рашед Маңғыстау облысында жүргізген кластерлік зерттеу нәтижесінде (МИКС) көп көрсеткіштер бойынша облыс әкімдігінің жоғары деңгейдегі үйлестіруін атап өтті.

МИКС нәтижелері бойынша өңірдің әлеуметтік-экономикалық дамуы оң динамика көрсетіп отыр. Бүгінде Маңғыстау облысы әлеуметтік салаларға, атап айтқанда білім беру, денсаулық сақтау және әлеуметтік қорғауға бөлінетін бюджет үлесі бойынша еліміздегі үздік бес өңірдің қатарында. Өңір халқының 40%-дан астамы шағын және орта бизнес саласында еңбек етіп, экономиканың дамуына үлес қосуда. Сондай-ақ жаңа туған нәрестелерді босанғаннан кейінгі бақылау көрсеткіші 94,2%-ды құрап, орташа өмір сүру ұзақтығы 75,8 жасқа дейін артқан.

Маңғыстаудың денсаулық сақтау саласындағы жетістіктері де айрықша атап өтілді. Өткен жылғы МИКС нәтижелеріне сәйкес, өңірде нәресте өлім-жітімінің нөлдік көрсеткіші тіркелген. Сонымен қатар соңғы он жылда бес жасқа дейінгі балалар өлімі алты есеге азайған.

Кездесу аясында жастарға арналған «жасыл» дағдылар мен мамандықтарды дамыту, экологиялық білім беру, волонтерлік іс-шараларды өткізу мәселелері де қаралды.

Өңір басшысы Нұрдәулет Қилыбай ЮНИСЕФ-пен әріптестікті одан әрі нығайтуға, балалар мен жастардың әл-ауқатын арттыруға бағытталған бірлескен жобаларды жүзеге асыруға дайын екенін айтты.

Айта кетейік, ертең 11 шілде күні Ақтауда ЮНИСЕФ-тің Қазақстандағы алғашқы жастар шарасы өтеді. Іс-шара волонтерлердің балалар құқықтарын қорғау мен қоршаған ортаны сақтаудағы рөлін арттыруға, сондай-ақ ЮНИСЕФ Волонтерлік мектебінің ашылуына арналмақ. Қазіргі таңда өңірден 358 жас волонтер тіркеліп үлгерді.

Маңғыстау облысы әкімінің баспасөз қызметі

• 10.07.2025
• 4