Нұрдәулет Қилыбай: Карьер жұмысы қоршаған ортаға зиянсыз жүргізілуі тиіс

10 шілде күні Маңғыстау облысының әкімі Нұрдәулет Қилыбайдың төрағалығымен Шетпе ауылы маңындағы қиыршық тас карьерлерінің қызметіне қатысты кеңейтілген жиын өтті. Жиынға Маңғыстау ауданы әкімінің орынбасары, жауапты басқарма, департамент басшылары, құқық қорғау органдары, карьер иелері мен азаматтық қоғам өкілдері қатысты.

Бүгінде Маңғыстау ауданы аумағында барлығы 25 карьер тіркелген. Оның ішінде 20 карьер келісімшарт негізінде, 5 лицензиямен жұмыс істейді.

Жергілікті тұрғындар карьерлердегі жарылыс жұмыстарының дүмпуінен, шаң-тозаңнан және ауыр көліктердің қозғалысынан туындайтын экологиялық, материалдық мәселелерге шағымданып отыр.

Облыстық табиғи ресурстар және табиғат пайдалануды реттеу басқармасының басшысы Сәбит Дүйсекеновтің айтуынша, биылғы жартыжылдықта 16 нүктеден алынған 66 сынаманың барлығы да экологиялық нормаларға сай келген. Дегенмен, карьер қызметін заң талаптарына сәйкестендіру, тұрғындардың тыныс-тіршілігіне әсерін азайту бойынша бірқатар нақты ұсыныстар айтылды. Яғни, жарылыс жұмыстарында заң талаптарын қатаң сақтау, міндеттемелерді орындамаған кәсіпкерлердің лицензияларын қайтару, арнайы рұқсаты жоқ мекемелермен жұмыс істемеу, жүктасымалдау ережелерін сақтау, жер учаскесін игеру талаптарын орындау, жүк көліктеріне өлшеу құрылғысын орнату сынды ұсыныстар айтылды.

Мәселені бірлесіп шешу мақсатында Шетпе әкімдігі мен 6 карьер арасында ынтымақтастық туралы меморандумға қол қойылған. Қалған 2 карьермен келіссөздер жүргізілуде. Сонымен қатар карьер аумағына бейнебақылау камералары орнатылып, олар аудандық ішкі істер бөлімінің орталықтандырылған жүйесіне қосылмақ.

Жиын барысында облыс әкімі Нұрдәулет Қилыбай бірқатар нақты тапсырмалар жүктеді. Ол кәсіпкерлердің жер қойнауын пайдалану кезінде қоршаған ортаға зиян келтірмеуге, халықтың қауіпсіздігін бірінші орынға қоюға шақырды.
 

– Әр кәсіпкер өз жұмысында экологиялық қауіпсіз тәсілдерді қолдануы қажет. Жарылыс жұмыстары алдын ала ескертіліп, сол уақытта арнайы комиссия тексеріс жүргізсін. Құжаттары толық емес, заң талаптарына сай келмейтін карьерлердің жұмысы тоқтатылуы керек. Ең бастысы – халықтың амандығы мен қауіпсіздігі әрқашан бірінші орында тұруы тиіс, – деді өңір басшысы.

Облыс әкімі Нұрдәулет Қилыбай жиын барысында нақты тапсырмалар жүктеп, әр карьердің заң талаптарын қатаң сақтауы мен экологиялық қауіпсіз тәсілдерді қолдануы қажеттігін айтты.

Маңғыстау облысы әкімінің баспасөз қызметі

• 14.07.2025
• 5