Жаңа фермалар мен технологиялар: Қарағанды облысында мал шаруашылығы қалай дамып келеді

Қарағанды облысында ауыл шаруашылығы қарқынды дамып келеді. Аймақта мал шаруашылығы саласында бірқатар жаңа жобалар іске қосылып, өнім көлемі артып отыр. Ет, сүт және жұмыртқа өндірісінің ұлғаюы — жергілікті фермерлердің бастамалары, инвестициялық серпін және жаңа технологиялардың енгізілуінің тікелей нәтижесі. Биылдың өзінде мал шаруашылығы саласында жеті жаңа жоба жүзеге асырыла бастады. Ал 2027 жылға дейін тағы 19 жоба қолға алынады. Бұл жобалар 500-ге жуық жаңа жұмыс орнын ашуға мүмкіндік береді.

Өндірістің ұлғаюы мал басын өз ішінде көбейту, өнімділікті арттыру және тұқым сапасын жақсарту арқылы қамтамасыз етілуде. Сонымен қатар, жаңа технологияларды енгізіп, жем-шөп базасын кеңейтуге басымдық берілуде.

Жаңа жобалардың бірі — Нұра ауданындағы «Рамадан» ЖШС-не тиесілі сүт фермасы. Қазір мұнда 400-ге жуық голштино-фриз тұқымды ірі қара мал бар. Жыл соңына дейін бұл көрсеткіш 1100 басқа дейін ұлғаяды деп жоспарланған. Кәсіпорын толық қуатында жұмыс істеген кезде тәулігіне 27 тоннаға дейін сүт өндіре алады.

Шет ауданында «ТАУ» шаруашылығы жылқы өсірумен айналысып отыр. Шаруашылық жылқы санын 3 мың басқа дейін көбейтуді көздеп отыр. Бұдан бөлек, мұнда 500 басқа арналған ірі қара малдың асыл тұқымды репродукторы салынып жатыр.

Қарқаралы ауданында мал бордақылау алаңдарына ерекше көңіл бөлінген. Ауданда бүгінде 1000 бас ірі қара мен 1000 қойға арналған мал бордақылау кешендері жұмыс істеп тұр.

Абай ауданында сүт шаруашылығы бағыты дами түсуде. Құлайғыр ауылында жаңа сүт қабылдау пункті іске қосылды. Тағы бір пункт Есенгельді округінде ашылады деп жоспарланып отыр.

Құс шаруашылығы да тұрақты дамып келеді. Облыстағы құс өнімінің шамамен 70%-ы Бұқар жырау ауданында өндіріледі. Мұнда «Ақнар ҚФ» алты құс қорасын қайта жаңғыртып жатыр. «Үштөбе Құс» жаңа жұмыртқа жинау желісін іске қосып, жеке электр желісін салу жұмысын бастап кеткен. Ал «Майқұдық жұмыртқасы» мен «Қарағанды Құс» өндірістік құс тобын 180 мың жұмыртқа бағытындағы тауықпен жаңартты.

Сонымен қатар, өңірде мал азығын өндіруге арналған егістік алқаптар кеңеюде. Биыл 8 мың гектардан астам суармалы жер ауыл шаруашылығы айналымына енгізіледі деп күтілуде. Бұл — малды сапалы жем-шөппен қамтамасыз етудің маңызды тетігі.

Жұмыртқа мен ет өндірісінің әлеуеті жоғары болғанымен, кейбір аудандарда көрсеткіштер әлі де төмен. Жобалардың уақытылы әрі тиімді іске асырылуын қамтамасыз ету керек. Сонымен қатар, асыл тұқымды малдың үлесін арттырып, өндіріс көлемін ұлғайту қажет. Аудан әкімдері бұл жұмыстарды жергілікті деңгейде жеке бақылауға алуы тиіс. Бұл — өңірдің азық-түлік қауіпсіздігі мен тұрақты дамуына тікелей әсер ететін мәселе.

• 14.07.2025
• 7