Нұрдәулет Қилыбай Жаңаөзендегі мектептердің құрылыс барысын жеделдетуді тапсырды

Бүгін, 16 шілде күні Маңғыстау облысының әкімі Нұрдәулет Қилыбай Жаңаөзен қаласындағы бірқатар білім беру нысандарын аралап, мектептердің құрылыс және күрделі жөндеу жұмыстарының жай-күйін қарады.

Алдымен аймақ басшысы Рахат-4 ауылындағы «Мерей» шағынауданында бой көтеріп жатқан 1200 орындық Келешек мектебінің құрылыс алаңына барды. Заманауи білім ошағы STEM зертханаларымен, шығармашылық бағыттағы қыш өнері, визуалды дизайн және хореография кабинеттерімен жабдықталуда. Сондай-ақ ерекше білім беруді қажет ететін оқушылар үшін сенсорлық кабинет, логопед, дефектолог және психолог бөлмелері қарастырылады.

Жаңа оқу жылынан бастап мұнда 1500-ге жуық бала білім алмақ. Нысан биыл қыркүйек айында пайдалануға беріледі деп күтілуде.

Әрі қарай облыс әкімі Жаңаөзен қаласындағы №7 жалпы білім беретін мектептің күрделі жөндеу жұмыстарының барысын тексерді. 1982 жылы салынған бұл мектеп соңғы рет 2011 жылы жөндеуден өткен. Қазіргі таңда 1700-ге жуық оқушы білім алатын білім ордасында екі спорт залы, кітапхана, асхана, 150 орындық акт залы және жаңа үлгідегі пән кабинеттері қарастырылған. Мұнда 150-ге жуық педагог қызмет етеді.

Өңір басшысы Нұрдәулет Қилыбай мердігер мекемелерге мектептерді сапалы әрі мерзімінде аяқтауды тапсырды.
 

- Жаңа оқу жылына бір ай ғана уақыт қалды. Құрылыс пен жөндеу жұмыстары сапалы әрі белгіленген мерзімде аяқталуы тиіс. Қыркүйектен бастап мектептер қалыпты жағдайда өз жұмыстарын бастауы керек, - деді Нұрдәулет Қилыбай.

Айта кетейік, қазіргі таңда Маңғыстау облысы бойынша білім беру саласында 5 нысанда күрделі жөндеу жұмыстары жүргізілуде. Бұған қоса, Жаңаөзенде екі мектептің асханаларына күрделі жөндеу жұмыстары қолға алынған.

Маңғыстау облысы әкімінің баспасөз қызметі

• 16.07.2025
• 31