Нұрдәулет Қилыбай CMEC делегациясымен кездесті

24 шілде күні Маңғыстау облысының әкімі Нұрдәулет Қилыбай Қытай машина жасау инжиниринг корпорациясының (CMEC) делегациясымен кездесті. Тараптар индустриялық-инфрақұрылымдық жобаларды дамыту, инвестициялық ынтымақтастықты кеңейту мәселелерін талқылады.

Басқосуда CMEC делегациясы Маңғыстау облысының инженерлік, өндірістік және инфрақұрылымдық дамуына жоғары баға беріп, аймақтың Еуразиялық көлік дәлізіндегі стратегиялық маңызы мен инвестициялық әлеуетін атап өтті.

CMEC - SINOMACH корпорациясының құрылымдық бөлімі болып саналады. Компания әлемдік деңгейдегі инжинирингтік жобалау, өндірістік даму және құрылыс мердігерлігі салаларында жетекші орынға ие.

Облыс әкімі Нұрдәулет Қилыбай өңірдің шетелдік инвестициялар үшін қолайлы алаң екенін атап өтіп, кез-келген ынтымақтастыққа дайын екендігін жеткізді.

- Мемлекет басшысы Қасым-Жомарт Тоқаевтың Қытай Халық Республикасымен достық қарым-қатынасты нығайту, өзара тиімді ынтымақтастықты дамыту бағыты аясында біз де Қытай тарапымен стратегиялық әріптестікті күшейтуге дайынбыз. Біздің өңіріміз инвестициялық жобаларды жүзеге асыру үшін айтарлықтай әлеуетке ие. Бүгінде өңірде көлік және логистика, туризм, өңдеу өнеркәсібі, сондай-ақ агроөнеркәсіп кешені салалары тұрақты дамып келеді. Сондай-ақ, Маңғыстау облысы дәстүрлі түрде еліміздің ірі өнеркәсіптік өңірлерінің бірі саналады. Соңғы жылдары облыс аумағында трансұлттық компаниялардың қатысуымен бірқатар инвестициялық жобалар табысты жүзеге асырылды. Біз өзара тиімді ынтымақтастықты нығайтуға және экономикалық байланыстар мен сауда қатынастарын кеңейтуге бағытталған кез келген бастамаларды қолдауға әрдайым дайынбыз, - деді Нұрдәулет Қилыбай.

Кездесу соңында тараптар энергетика, көлік және логистика, мұнай-химия салаларында бірқатар инвестициялық жобалар бойынша бірлесіп жұмыс істеуге уағдаласты.

Маңғыстау облысы әкімінің баспасөз қызметі

• 25.07.2025
• 21