Облыс әкімдігінде бюджет комиссиясының отырысы өтті

Бүгін, 1 тамыз күні Маңғыстау облысы әкімінің бірінші орынбасары Ербол Ізбергеновтің төрағалығымен облыстық бюджет комиссиясының отырысы өтті. Жиында 2025–2027 жылдарға арналған облыстық бюджетті нақтылау мәселесі қаралды.

Экономика және бюджеттік жоспарлау басқармасының басшысы Тілеген Едігеевтің айтуынша, қазіргі таңда облыс бюджеті 722 млрд теңгені құрап отыр.

- Алдағы кезеңге арналған нақтылау нәтижесінде бюджет құрылымы оңтайландырылып, бірқатар жобалар бойынша ішкі қайта бағыттаулар жүргізілді. Бюджетті нақтылау барысында әлеуметтік салаларға, атап айтқанда білім беру, денсаулық сақтау және әлеуметтік қолдау мен өңіріміз үшін маңызды инфрақұрылымдық жобаларды іске асыруға басымдық берілді, - деді Тілеген Едігеев.

Білім беру саласында жергілікті бюджет есебінен ішкі ығыстырулар арқылы 779 млн теңге бөлінген. Бұл қаражат білім беру мекемелерінің материалдық-техникалық базасын нығайтуға, балабақшалар мен арнайы білім беру ұйымдары және колледж ғимараттарын жөндеуге, сондай-ақ әлеуметтік төлемдермен қамтуға бағытталмақ.

Денсаулық сақтау саласына мемлекеттік сатып алудан үнемделген қаражат есебінен 498 млн теңге бөлінуі жоспарланып отыр. Бұл қаржы дәрі-дәрмекпен қамтамасыз ету, медициналық мекемелердің материалдық базасын жақсарту, күрделі және ағымдағы жөндеу жұмыстарына, жобалық-сметалық құжаттама әзірлеуге және медициналық ақпараттық жүйесін енгізуге жұмсалмақ.

Сондай-ақ, әлеуметтік қамсыздандыру, мәдениет пен спорт инфрақұрылымын жаңарту, кәсіпкерлік пен балық шаруашылығын дамыту, көлік инфрақұрылымын жетілдіру және әлеуметтік осал топтарды баспанамен қамту шаралары қарастырылған.

Өңірдің даму бюджеті аясында Ақтау қаласының магистралды жылу желілерін тарту, су тұщыту қондырғыларын салу, елді мекендердегі ауыз су және кәріз жүйелерін жаңарту, жол құрылысын бастау көзделіп отыр.

Жиын барысында «Таза Қазақстан» бағдарламасы аясында аудан және қала деңгейінде жаңадан ашылған мемлекеттік коммуналдық мекемелерді лизинг арқылы арнайы техникалармен қамтамасыз ету мәселесі де талқыланды.

Отырыс соңында Ербол Ізбергенов күн тәртібіндегі мәселелер бойынша нақты тапсырмалар берді.
 

- Бюджетке енгізілетін өзгерістер жобасын айтылған ұсыныстар мен ескертулерді ескере отырып қайта әзірлеуді және оны облыстық мәслихаттың келесі сессиясына ұсынуды тапсырамын. Сондай-ақ, Мемлекет басшысы Қасым-Жомарт Тоқаевтың тапсырмасымен бастау алған «Таза Қазақстан» экологиялық акциясын орындау мақсатында тиісті шараларды жүргізу қажет, - деді Ербол Ізбергенов.

Маңғыстау облысы әкімінің баспасөз қызметі

• 01.08.2025
• 28