Қазақстанның кеден жүйесін трансформациялау

ҚР Президенті мен Үкіметтің тапсырмаларын орындау мақсатында Қаржы министрлігі шекарадан өту процесін ашық, жылдам әрі қауіпсіз етуге бағытталған шекаралық инфрақұрылымды жүйелі түрде жаңғыртуды іске асырып келеді.

2025 жылдың басынан бастап еліміздің ҚХР және Өзбекстанмен арадағы шекаралық аймақтарда орналасқан төрт жаңғыртылған өткізу пункттері: «Қалжат», «Алакөл», «Қапланбек» және «Атамекен» жұмыс істеп келеді. Олар заманауи техникамен жабдықталған: инспекциялық-тексеру кешендері, автоматты таразылар, цифрлы сканерлер және онлайн-бақылау жүйелері қарастырылған. Енді жүргізушілер бақылау процедурасынан көліктен шықпай өте алады және шекарадан өтудің орташа уақыты 30 минутқа дейін азайды. «Бір терезе» қағидаты арқылы барлық рәсім бірыңғай технологиялық дәлізде жүзеге асырылады.

Жыл соңына дейін тағы бес өткізу пунктін жаңғыртуды аяқтайтын боламыз: «Қазығұрт», «Темір баба», «Тәжен», «Бақты және «Майқапшағай». Бұл бағытқа арналған инвестициялар еліміздің транзиттік әлеуетін дамытып, бизнес, логистика саласы мен азаматтарға жайлы қызмет пен тиімділікті арттыруға септеседі.

Кеден ісін цифрлы трансформациялау бағытында да маңызды қадамдар жасалды. 2023 жылдан бастап ЕАЭО сыртқы шекарасының барлық автомобиль пунктінде CargoRuqsat электронды кезек жүйесі жұмысы жолға қойылды. Бұл кезектер мен көліктің ретсіз кептелесін жоюға мүмкіндік берді. 20 модульден тұратын «Кеден» цифрлы платформасын енгізу (оның 13-і жұмыс істеп тұр) рәсімдеу процесін түбегейлі өзгертті: электронды декларациядан бастап тауарларды онлайн-бақылау мен есепке алуға дейін.

Жақында «Темір баба» және «Тәжен» пункттерінде жүргізіліп жатқан жаңғырту жұмыстары тексерілді. Қазақстанды Таяу Шығыспен, Оңтүстік Азиямен, Еуропамен және Ресеймен байланыстыратын екі нысанның геосаяси және экономикалық маңызы зор. Қаржы министрлігі жұмыстың орындалу сапасы мен мерзімдердің сақталуын қатаң бақылайды.

Біздің көздегеніміз – шекарадан өтуді ашық, қауіпсіз, жылдам және ыңғайлы ету. Біз халықаралық сауда талаптарына сәйкес келетін инфрақұрылымды құруға баса мән беріп отырмыз.

• 14.08.2025
• 33