Қазақстан 2026 жылы IPAF мерейтойлық саммитін өткізеді

2026 жылы елімізде International Public Asset Management Company Forum (IPAF) халықаралық конференциясы мен ұйымның X мерейтойлық cаммиті өткізіліп, Қазақстанға бүкіл халықаралық кәсіби қоғамдастықтың назары бұрылады. Бұл Азия даму банкінің (АДБ) қолдауымен стрестік активтерді басқарумен айналысатын Азиядағы мемлекеттік ұйымдарды біріктіретін беделді алаң.

Қазақстанда саммитті өткізу туралы шешім 13 тамызда Ұлан-Батырда (Моңғолия) өткен IPAF IX саммитінде қабылданды. Бұл біз үшін үлкен мәртебе, сонымен қатар еліміздің стрестік активтердің тиімді нарығын дамыту саласындағы беделін айқындайды.

«Проблемалық кредиттер қоры» АҚ ресми түрде IPAF-тың толыққанды мүшесі мәртебесін алғаны ерекше маңызға ие. 2013 жылдан бастап аталған қор қауымдастырылған мүше атанып, тәжірибе жинақтап, IPAF-тың негізгі бастамаларына қатысты. Енді 2026 жылы ол IPAF төрағалығын қабылдап қана қоймай, келесі саммит пен халықаралық конференцияның ұйымдастырушысы болады.

Бүгінде жұмыс істемейтін несиелерді басқару (NPL) мәселелері жаңа деңгейге көтеріліп келеді. IPAF алаңында стрестік активтерді бағалауды жақсартуға, қарызды реттеу процестерін оңтайландыруға және сауда-саттықтың ашықтығын арттыруға мүмкіндік беретін жасанды интеллект, блокчейн және цифрлы платформалар сияқты заманауи құралдар белсенді түрде талқыланып жатыр.

Қазақстан үшін IPAF мерейтойлық саммитін өткізу проблемалық активтермен жұмыс істеу бағытындағы тәжірибені халықаралық қоғамдастыққа ұсынуға, өзекті сын-қатерлерді талқылауға және практикалық шешімдер табуға, жаңа кәсіби байланыстар орнатуға және жетекші сарапшылармен ынтымақтастықты нығайтуға, сондай-ақ отандық мамандардың құзыреттерін кеңейтуге және үздік әлемдік тәжірибелерді енгізуге мүмкіндік береді.

Қазақстандағы IPAF X саммиті жаһандық ынтымақтастықты дамыту үшін маңызды қадам болатынына және еліміздің стрестік активтерді басқару саласындағы сенімді әріптес ретіндегі ұстанымын нығайтатынына сенімдімін.

• 18.08.2025
• 13