Келесі жылға арналған бюджеттің теңгерімі Ұлттық қордың нысаналы трансферттерісіз сақталып отыр

ҚР Үкіметі отырысында 2026-2028 жылдарға арналған республикалық бюджет туралы заң жобасын таныстырдым. Аталған құжат әлеуметтік-экономикалық даму болжамының негізінде әзірленді және мемлекеттің негізгі басымдықтарын көрсетеді: азаматтарды әлеуметтік тұрғыда қорғау, экономикалық өсімді ынталандыру және бюджет шығыстарының тиімділігін арттыру.

2026 жылға жоспарланған кіріс көлемі 23,1 трлн теңге болып, 2028 жылға қарай оның мөлшері 27,6 трлн теңгеге дейін артады деп көзделген. Бұл ретте келесі жылға арналған бюджеттің теңгерімі алғаш рет Ұлттық қордың нысаналы трансферттерісіз сақталып отырғанын айта кетейін. Бұл мемлекеттік қаржының тұрақтылығын нығайтудағы маңызды қадам.

2026 жылға арналған республикалық бюджеттің шығыстары 27,7 трлн теңге мөлшерінде болып, бұл қазіргі деңгейден 2 трлн жоғары. Осы ретте біз әлеуметтік блокты айтарлықтай нығайттық. Ол барлық шығынның 38,7% көрсетіп отыр. Бұл әлеуметтік төлемдерді 10% индекстеумен, зейнетақы мен жәрдемақы алатын адамдардың ұлғаюымен, сонымен қатар 20 мыңға жуық студентке стипендия мен оқуды қаржыландырумен байланысты.

Экономиканың нақты секторына айрықша мән берілген. Айталық, 2026 жылы агроөнеркәсіптік кешенді дамытуға (732 млрд), көлік инфрақұрылымы (855 млрд) және энергетика саласы мен ТКШ жаңғырту жөніндегі жобаларды қоса алғанда 3,6 трлн теңге бөлінді. Алғаш рет мұндай жобалар бюджеттен бөлек банктер мен ұлттық даму институттары арқылы да іске асырылатын болады.

Тағы бір айта кетерлігі, экономиканың өсімін ынталандыратын шығыстар бір жарым есеге ұлғайды: 10,9% 16,1% дейін. Бұл өндіріске, экспортқа және кәсіпкерлікке көбірек инвестиция тартып, жаңа жұмыс орындарын ашу мен өңірлерді дамытуға серпін береді.

Осы арқылы 2026-2028 жылдарға арналған бюджет жобасы әлеуметтік бағыт пен экономикалық өсімді біріктіріп отыр. Біздің мақсатымыз – қаражатты бөлу ғана емес, сонымен қоса сапалы өсімді қамтамасыз ету, азаматтардың өмір сүру деңгейін арттыру және еліміздің қаржылық тұрақтылығын нығайту.

• 26.08.2025
• 40