Қазақстанда Жазғы науқан – 2025 аяқталды: 3,2 миллион оқушы демалыс пен сауықтыру бағдарламаларына қатысты

Оқу-ағарту министрлігінің «Балдаурен» республикалық оқу-сауықтыру орталығында жазғы каникул кезеңінде балалардың сауықтыру демалысын, бос уақытын және жұмыспен қамтылуын ұйымдастыру жұмыстары қорытындыланды. Оған мемлекеттік, жекеменшік балалар лагерьлерінің басшылары, сондай-ақ Денсаулық сақтау, Ішкі істер, Төтенше жағдайлар министрліктерінің және үкіметтік емес ұйымдардың өкілдері қатысты. Биыл демалыс және сауықтыру бағдарламаларымен 3,2 миллион оқушы қамтылды, бұл өткен жылмен салыстырғанда 200 мың балаға көбейгенін көрсетеді. Оның ішінде 500 мыңнан астам бала әлеуметтік осал санаттағы отбасылардан. «Қазақстан халқына» қорының қолдауымен «Жаздық жолдама» жобасы жүзеге асырылып, 10 мың балаға тегін демалу мүмкіндігі берілді. Сондай-ақ республикалық орталықтарда 5 мыңға жуық бала жазғы демалысын өткізді. Естеріңізге сала кетейік, биыл жазда ел бойынша жыл бойы жұмыс істейтін 17 лагерь және 192 маусымдық сауықтыру орталығы, сондай-ақ 10 мыңнан астам мектеп жанындағы лагерьлер жұмыс істеді. Науқанды ұйымдастыру 9 мемлекеттік органның бірлескен жоспары және министрліктің әдістемелік ұсынымдары аясында жүргізілді. Балалардың сапалы әрі қауіпсіз демалысын қамтамасыз ету үшін сауықтыру нысандарына қойылатын талаптардың алгоритмі енгізілді. Сонымен қатар, балалармен мазмұнды жұмыс жүргізу үшін 120 мың тәрбиеші-педагог даярланып, 12 мыңнан астам студент-ерікті тартылды.

• 08.09.2025
• 17