Облыс әкімінің жеке қабылдауына 23 тұрғын келді

Ақтөбеліктер тұрғын үй, коммуналдық мәселелер, инфрақұрылым, жұмыспен қамту және басқа да әлеуметтік маңызы бар тақырыптар бойынша өтініштерін жеткізді.

Арыз-шағымның басым бөлігі - тұрғын үймен қамту мәселесі. Мүгедектігі бар азаматтар, көпбалалы отбасылар, жетім балалар тұрғын үй алу, кезектің жылдамдатылуы немесе уақытша берілген пәтерді ауыстыруға қатысты көмек сұрады. Мәселен, «Қарғалы» тұрғын алабының тұрғыны берілген бір бөлмелі пәтерін басқасына ауыстыруды өтінді.

Сондай-ақ мектеп салу, бейнебақылау орнату, көше жарығы мен абаттандыруға қатысты өтініштер түсті.

Бір топ азамат бірнеше жыл бойы «Арман» тұрғын үй кешенінде «Строй Сервис Регион Актобе» және «Ақзам Строй Сервис» құрылыс компанияларынан пәтерлерін ала алмай жүргенін мәлімдеді. Сот шешімдері болғанына қарамастан, мәселе шешімін таппаған. Әкім прокуратура және тиісті органдарға бұл жағдайды бақылауға алуды тапсырды.

«Қарғалы» тұрғын алабындағы бір үйдің тұрғындары «Aqtobe su-energy group» коммуналдық кәсіпорнымен дауды шешуге көмек сұрап келді. Әкім мәселені жан-жақты қарауды және мүдделі тараптардың кездесуін ұйымдастыруды тапсырды.

Сонымен бірге, бір азамат баласын Ташкентте емдету үшін демеуші тауып беруді сұрады. Жұмыссыз қалған медбике еңбекке қайта орналастыруға жәрдемдесуді сұрады.

«Барлық өтінішті жеке бақылауыма аламын, әрқайсысы бойынша тиісті құрылымдарға тапсырмалар беріледі. Біз әрқашан халықпен ашық диалогқа дайынбыз. Тек бірге, бір-бірімізді тыңдай отырып, тиімді шешімдер таба аламыз», – деді Асхат Шахаров қабылдауды қорытындылай келе.

• 15.09.2025
• 38