Ақмола облысында орақ науқанының жүргізілу барысы мен ауыл шаруашылығын цифрландыру мәселелері талқыланды

Жиынға аудан және қала әкімдері, облыстық басқармалар мен Ауыл шаруашылығы министрлігінің аумақтық инспекцияларының басшылары, ауыл шаруашылығы бөлімдерінің жетекшілері, сондай-ақ орақ науқанына тартылған барлық ұйымдар қатысты.

Ақмола облысының әкімі Марат Ахметжанов астық жинаудың табысты өтуі елдің азық-түлік қауіпсіздігіне тікелей әсер ететінін атап өтті.

«Биыл мемлекеттік қолдаудың арқасында өңірде 7 миллион тоннадан астам сапалы астық жинау жоспарланып отыр. Бұл көрсеткіш Ақмола облысының еліміздің басты астықты аймағы мәртебесін тағы да дәлелдеуі тиіс. Осы бағытта біз нақты жұмыстарды жүзеге асыруымыз қажет», – деді Марат Ахметжанов.

Айта кетейік, биыл облыс бойынша жалпы егіс алқабы 5,5 миллион гектарды құрады, бұл өткен жылмен салыстырғанда 211 мың гектарға артық. Майлы дақылдардың егіс көлемі алғаш рет 490 мың гектардан асты.

Ауыл шаруашылығы және жер қатынастары басқармасының басшысы Нұрбек Бадырақовтың мәліметінше, бүгінгі таңда облыста 3,2 млн гектардан астам астық бастырылды. Орташа гектар берекелілігі 15,6 центнерден шығып, шамамен 5 млн тонна өнім алынды. Оның басым бөлігі жоғары сапаға сай келеді.

«Қазіргі таңда басты міндеттердің бірі – ауыл шаруашылығында инновациялық әдістерді қолдану арқылы өнім көлемін ұлғайту», – деді басқарма басшысы.

«Президенттің тапсырмасына сәйкес, ауыл шаруашылығы кәсіпорындары өндіріс үдерісіне жасанды интеллектті белсенді енгізуі тиіс. Бұл тек ресурстарды тиімді пайдалануға ғана емес, жұмыс барысын дұрыс ұйымдастыруға да мүмкіндік береді. Сонымен қатар, біздің өңір пилоттық аймаққа айналып, цифрландырылған ауыл шаруашылығы кәсіпорындары тексерусіз әрі құжатсыз мемлекеттік қолдау шараларын ала алады», – деп атап өтті өңір басшысы.

Айта кетсек, облыста ауыл шаруашылығын цифрландыру жұмыстары жүргізілуде. Зеренді ауданындағы «Диқан плюс» шаруашылығында жасанды интеллект элементтері енгізілген. Бағдарлама жұмыс тиімділігін есептеп, әрі қарайғы қызметке қатысты ұсыныстар береді.

Жиын қорытындысы бойынша облыс әкімі астық қабылдау кәсіпорындары мен шаруашылық токтарында тәулік бойы астық қабылдау және кептіруді қамтамасыз етуді, сондай-ақ ауыл шаруашылығы басқармасына АӨК-ні цифрландыру жұмыстарын жандандыруды тапсырды.

• 25.09.2025
• 38