Ақтау қаласында дзюдодан ашық Азия чемпионаты өтеді

Бүгін облыс әкімі Серікбай Трұмов дзюдодан Бейжің Олимпиадасының күміс  жүлдегері, ҚР еңбек сіңірген спорт шебері Асхат Житкеевты қабылдады. 

Қазақ Дзюдо федерациясының бас хатшысы А.Житкеев 13-14 наурыз күндері Ақтау қаласында өтетін дзюдодан ерлер және әйелдер арасындағы ашық Азия Кубогының жай-жапсары жөнінде баяндады. 

Тұрар Жолдыбаевты еске алуға арналған турнирге 6 елден 200-ден астам татами шебері қатысады.

Халықаралық дзюдо федерациясының ережесіне сай, лицензиялық жарыс саналатын ашық Азия кубогының жеңімпаздары мен жүлдегерлеріне рейтингілік ұпайлар беріледі. Спорттық шара Маңғыстау арена спорт кешенінде барлық санитарлық талапқа сай көрерменсіз өткізіледі. 

Облыс әкімі С.Трұмов еліміздің көк туын көкке көтеретін жас спортшылардың көбеюіне тілектестігін білдіріп, турнирдің жоғары деңгейде өтуіне сәттілік тіледі. 

Асхат Житкеев өңір басшысы Серікбай Өтелгенұлына “Дзюдо федерациясы” республикалық ҚБ президенті Қ.Қожамжаровтың арнайы беріп жіберген Алғыс хатын табыстады. 

Айта кетейік, Асхат Житкеев 2001 жылы Мюнхен қаласында өткен әлем чемпионатының қола жүлдегері, екі дүркін Азия чемпионатының жеңімпазы атанған спортшы. 

Маңғыстау облысы әкімінің баспасөз қызметі

• 15.03.2021
• 220