Цифрландыру – мемлекеттік қаржы жүйесін басқарудағы тиімді тетік

Президентке республикалық бюджеттің орындалу барысы мен мемлекеттік қаржы саласының цифрлы трансформациясы жөнінде айтып бердім.
Әуелі бюджет кірісін ұлғайтудағы оң үрдіс туралы айта кетейін. 2025 жылға арналған республикалық бюджет 21,6 трлн теңгеге артып, оның 15,2 трлн теңгесі – салық түсімдері. Аталған көрсеткіш былтырғы кезеңмен салыстырғанда 23,4% жоғары. Бұл экономиканың тұрақтылығы мен іскерлік белсенділіктің өскенін көрсетеді. Биыл тоғыз айдың қорытындысы бойынша бюджеттің атқарылуы – 101,6%. Осы ретте шығыстардың әлеуметтік бағыты сақталып отырғанын айта кеткен орынды.
Қаржы министрлігінің жұмысындағы басымдыққа ие бағыттардың бірі – мемлекеттік қаржыны басқару саласында цифрлы технологияларды дамыту. Мәселен, үлкен деректерді (Big Data) қалыптастырып, өңдеуге ерекше мән берілген. Бұл технология шешім қабылдау процесін оңтайландырып, тәуекелдерді бағалаудың дәлдігін арттыру мен кемшіліктерді тиімді анықтауға мүмкіндік береді. Салық және кеден саласында жасанды интеллектіні енгізу сыбайлас жемқорлықты едәуір азайтуға жол ашып, бюджет ресурстарын неғұрлым тиімді пайдалануды қамтамасыз етеді.
Бұдан бөлек кездесуде мемлекеттік аудиттің нәтижелерін де жеткіздім. 2025 жылдың 8 айында 791 тексеру жүргізіліп, жалпы сомасы 337,5 млрд теңгеге қаржылық кемшіліктер әшкереленді. Бұл көрсеткіш мемлекеттік қызметшілер арасында қаржылық тәртіп пен жауапкершілікті одан әрі нығайтудың маңыздылығын байқатады.
Түйіндесем, біздің ведомство мемлекеттік қаржының тұрақтылығын қамтамасыз ету, азаматтар алдындағы барлық әлеуметтік міндеттемені орындау мен бюджетті басқаруға арналған цифрлы инфрақұрылымды дамыту бағытындағы жұмысты жалғастыратын болады.

• 08.10.2025
• 29