Ақмола облысының әкімі Марат Ахметжанов Давид Дегтяревті әлемнің үш дүркін чемпионы атануымен құттықтады

Ақмола облысының әкімі Марат Ахметжанов Каир қаласында (Мысыр) өткен пара пауэрлифтингтен Әлем чемпионатында кезекті жарқын жеңіске жеткен Қазақстан Республикасының еңбек сіңірген спорт шебері Давид Дегтяревті құттықтады.

«Әлем чемпионатында көрсеткен тамаша нәтижелеріңізбен шын жүректен құттықтаймын! Сіз тағы да бүкіл әлемге рухтың күші, мақсатқа жетудегі табандылық пен еңбексүйгіштік ең жоғары нәтижелерге бастайтынын дәлелдедіңіз. Сіздің жеңісіңіз – Ақмола облысының ғана емес, бүкіл еліміздің мақтанышы.

Өңір намысын абыроймен қорғап, ақмолалық спортшылардың әлемнің ең үздіктері қатарында екенін тағы бір мәрте көрсеттіңіз.
Жоғары жетістіктеріңіз, табандылығыңыз және жас спортшыларға үлгі болар еңбегіңіз үшін алғысымды білдіремін.

Ақмола облысы тұрғындарының атынан Сізге мықты денсаулық, сарқылмас қуат, жаңа спорттық белестер мен жарқын жеңістер тілеймін!
Әр жеңісіңіз – жаңа жетістіктерге жол ашып, өңір спортының дамуына қосқан зор үлес. Алдағы уақытта да Сізді жаңа табыстар, жеңіс қуанышы мен лайықты құрмет күте берсін», – делінген облыс әкімінің құттықтауында.

Еске сала кетсек, ақмолалық спортшы Давид Дегтярев пара пауэрлифтингтен Әлем чемпионатында 54 келіге дейінгі салмақ дәрежесінде екі алтын медаль жеңіп алып, әлемнің үш дүркін чемпионы атанды.

• 15.10.2025
• 6