Ашықтық пен аналитикалық басқаруға бағытталған қадам

Мемлекет басшысы Қасым-Жомарт Тоқаевтың биылғы Жолдауында айтылған тапсырманы орындау мақсатында ҚР Қаржы министрлігі стратегиялық жоба - Мемлекеттік қаржы жүйесінің цифрлы картасын іске асыруды бастады.

Бұл - бірыңғай интерактивті картада еліміздің барлық негізгі қаржы мәліметін көрсететін заманауи жүйе. Мұнда әрбір цифр мен нысан географиялық орынға байланыстырылып, жүйе визуалды панель ретінде жұмыс істейді. Осы арқылы кез келген өңірде, қалада немесе тіпті белгілі бір ғимараттағы қаржылық ахуалды бағамдауға болады.

Қазір картада 2,5 млн салық төлеуші мен 1,4 млн кассалық аппарат туралы деректер қамтылған. «Чектер» функциясы арқылы барлық сатыпалым мен транзакцияларды нақты уақыт режімінде бақылауға болады. Тек 2025 жылдың алғашқы тоғыз айында 40,5 трлн теңгеден астам сомаға 3,9 млрд-қа жуық чек тіркелген. Бұл бүкіл ел бойынша экономикалық белсенділік пен сату динамикасын талдауға көмектеседі.

Сонымен бірге карта жекелеген аумақтардың, нысандардың табысы мен күмәнді операцияларды анықтауға және тексерулер жүргізіп, тапсырмаларды қалыптастыруға мүмкіндік береді. Анықталған кемшіліктердің бірі - чектерді ресімдемеу дұрыс жолға қойылмаған. Сондықтан да қазір Қаржы министрлігі Сауда және интеграция министрлігімен бірлесіп, есепке алуды ретке келтіріп, мәліметтерді дұрыс қалыптастыратын - Тауарлардың ұлттық каталогын әзірлеп жатыр.

Әрмен қарай жоба толықтырылып, жаңартылып отырады. Мәселен, жүйеге кедендік операциялар, бюджеттік кредиттер, отандық өндірушілер жайлы, жер қойнауын пайдалану, сол секілді жылжымайтын мүлік және жер учаскелері туралы ақпарат қосылады. Барлық мәлімет аудандар, қалалар мен өңірлер бойынша жинақталып, талдау жүргізіледі.

• 30.10.2025
• 29