Оңдасын Оразалин білім, мәдениет және спорт салаларын дамыту жұмыстарын жеделдетуді тапсырды

Облыс әкімі Оңдасын Оразалиннің төрағалығымен өткен аппарат жиынында білім, мәдениет және спорт салаларын дамыту сұрақтары қаралды. Жиналысқа облыс әкімінің орынбасарлары, мемлекеттік органдардың басшылары, аудан әкімдері бейнебайланыс арқылы қатысты.

Білім басқармасының басшысы Жолдас Батырхан білім беру саласын дамыту бойынша негізгі индикаторлар мен көрсеткіштердің 100% орындалғанын жеткізді. Оқу процесін қашықтан жүргізуді ұйымдастыру мақсатында 24605 компьютер сатып алынған. 3-6 жас аралығындағы балалар 100%, 1-6жас аралығындағы балалар 86,3% мектепке дейінгі тәрбиемен қамтылған. 26 мектепке дейінгі ұйым ашылды. Инклюзивті білім беру үшін 117 балабақша мен 303 мектепте жағдай жасалды. 110189 оқушы қосымша біліммен, 55807 спорт секцияларымен қамтылды. Бес мектеп пайдалануға беріліп, үш ауысымдық мектептер саны үш бірлікке азайды. Биыл 3585 орынға 26 мектепке дейінгі мекеме ашу жоспарланып отыр, материалдық базаны нығайту үшін 208 млн. теңге бөлінбек. Баяндамашы Тәуелсіздіктің 30 жылы ішінде өңірде жобалық қуаты 48​ 800 орын болатын 153 мектептің пайдалануға берілгенін айтты.

«Бұған қоса облыстағы 255 мектеп 30-50 жылдан астам уақыттан бері пайдаланылып келеді, соның ішінде 25 мектеп саманнан, 14-і ағаштан, бесеуі қамыстан салынған. Олардың дені Мұғалжар, Әйтеке би, Ырғыз, Байғанин аудандарында орналасқан. 2025 жылға дейін 49 мектеп салу жоспарда бар, оның ішінде екі мектеп мемлекеттік-жеке серіктстік механизмі бойынша, 33 мектеп бюджет есебінен салынатын болады»,- деді басқарма басшысы. ​ Сондай-ақ, Жолдас Батырхан жедел шешімді қажет ететін бірқатар проблемаларды атап өтті. Оның арасында кадр тапшылығына, метериалдық-техникалық базаның жаңартылуы мен цифрлық инфрақұрылымға байланысты сұрақтар бар.

• 16.03.2021
• 207