Зеренді ауданында музыка мектебі мен балалар шығармашылық үйіне арналған жаңа ғимарат ашылды

Зеренді ауылында балалар музыка мектебі мен балалар шығармашылық үйі орналасқан заманауи екі қабатты жаңа ғимарат ашылды.

Нысанның жалпы ауданы – 927 шаршы метр. Ғимарат орталықтандырылған жылыту және сумен жабдықтау жүйелерімен қамтылған, сондай-ақ мүмкіндігі шектеулі азаматтардың кедергісіз кіруі мен қозғалысы үшін толық бейімделген.

Бірінші қабатта музыка мектебі орналасқан. Мұнда сольфеджио, домбыра, қобыз, фортепиано және хор пәндері бойынша арнайы кабинеттер жабдықталған. Сонымен қатар, акт залы, кең холл және топтық сабақтарға арналған сынып бөлмесі бар.

Екінші қабатты Балалар шығармашылық үйі орналасқан. Мұнда үйірме кабинеттері, бейнелеу өнері сыныбы және мұғалімдер бөлмесі қарастырылған.

Ғимарат облыстық бюджет қаражаты есебінен сатып алынды. Бұл ауыл балалары үшін толыққанды білім беру және мәдени орталық құруға мүмкіндік берді.

Мекеме 2025 жылдың наурыз айында өз есігін айқара ашқан болатын. Бүгінде мұнда ауданның 500-ден астам жас тұрғыны білім алып жүр. Бұған дейін сабақтар жергілікті мектептің бір корпусында өткізіліп, шығармашылық қабілеттерді дамытуға арналған арнайы бөлмелер мен жағдайлар жеткіліксіз болған еді.

Енді жаңа ғимаратта заманауи білім беру ортасының талаптарына сай 18 кабинет жұмыс істейді. Орталықтың ашылуы Зеренді ауданының өмірінде маңызды оқиғаға айналып, қосымша білім беру жүйесін нығайтып, балалар шығармашылығын дамытуға кең мүмкіндік ашты.

• 04.11.2025
• 8