Ақмола облысы инвестициялық әлеуетін арттыруда

Жыл басынан бері Ақмола облысының экономикасына 660 млрд теңгеден астам инвестиция тартылды. Бұл өткен жылдың осы кезеңімен салыстырғанда 250 млрд теңгеге артық, деді өңір әкімі Марат Ахметжанов. Оның айтуынша, инвестиция тартудың негізгі құралы – төрт индустриялық аймақтың, оның ішінде республикалық «АҚМОЛА» аймағының құрылуы.

«Республикалық индустриялық аймақ инвесторлар үшін нағыз тартымды орталыққа айналып отыр. Онда жалпы құны 1 трлн теңгеден асатын жобалар жинақталды. Бұл 4 мыңнан астам жаңа жұмыс орнын ашуға мүмкіндік береді», - деді спикер ОКҚ алаңында өткен баспасөз конференциясында.

Бүгінгі таңда астықты терең өңдейтін алғашқы зауыттың құрылысы басталды. Инвестиция көлемі – 1,8 млрд АҚШ доллары. Кәсіпорында жылына 3 млн тоннаға дейін астық өңдеу жоспарланған. Сондай-ақ клинкер өнімдері мен қаптама кірпіш шығаратын және пестицид пен тыңайтқыштар өндіретін зауыттардың құрылысы жоспарланған. Қазан айында астықты терең өңдеудің екінші ірі кешенін салу жөніндегі стратегиялық негіздемелік келісімге қол қойылды. Инвестиция көлемі – 1,5 млрд АҚШ долларды құрап, онда 1000 тұрақты жұмыс орны ашылады. Сондай-ақ, ірі инвесторлар бидай өңдеу мен жем өндіру, элеватор мен құрама жем зауытын, сондай-ақ асыл тұқымды репродуктор салу бойынша жобаларды жүзеге асыруды жоспарлап отыр.

• 17.11.2025
• 7