Маңғыстауда газ құю бекеттеріне мониторинг күшейтіледі

Маңғыстау облысының сұйытылған мұнай газына ай сайынғы сұранысы 19 мың тонна. Оның 14500 тоннасы «Қазақ газ өңдеу» зауытынан жіберіледі. Қалғаны Атырау мұнай өңдеу зауытынан жеткізілуі тиіс еді. Аталған зауыт наурыздың соңына дейін жөндеу жұмыстарына жабылып, көлік отынының Маңғыстауға тасымалдануы уақытша тоқтатылды. 

Осыған орай, ҚР Энергетика министрлігінің ішкі нарығына сұйытылған мұнай газын беру өзгертілген жоспарына сәйкес, Маңғыстау облысына «СНПС-Ақтөбемұнайгаз» АҚ-нан қосымша 504 тонна сұйытылған газ бөлінді. Бұл сұйытылған газ алдағы 2-3 күнде өңірге келеді. 

Қалған қажеттілікті өтеп, қалыптасқан мәселені шешу үшін облыс әкімі шұғыл шешім қабылдады. «Қазақ газ өңдеу» зауытынан наурыз айының соңғы күндері берілетін газды бері жылжытып, бүгін-ертең газ құю бекеттеріне жіберіледі. Бұл мәселені толық шешуге мүмкіндік береді. 

Сонымен қатар қала, аудан әкімдіктерінен жұмыс тобы құрылып, газ құю станцияларына тәулік бойы мониторинг жүргізіліп отыр. Мақсат – өңірге бөлінген газдың халыққа уақытында жетуін қамтамасыз ету. Мониторинг жұмыстары күшейтіледі. 

Аймақ басшысы бұл жұмыстарды осы салаға жауапты орынбасарына жіті қадағалауды тапсырды. 

Маңғыстау облысы әкімінің баспасөз қызметі

• 17.03.2021
• 226