Ақтөбеде ерекше балаларға арналған арнайы мектепке 150 орындық қосымша ғимарат салынды

Облыс әкімі Асхат Шахаров оқу ордасының жаңа корпусын қарап шықты.

Ғимаратты «Номад Құрылыс Компаниясы» ЖШС салды, жоба құны - 1,5 млрд теңге.

Облыстық арнайы мектептің директоры Дина Трумованың айтуынша, арнайы мектепті кеңейту қажеттілігі облыс орталығында ақыл-ой дамуында ерекшелігі бар балалар санының артуымен байланысты. Жаңа жапсарлас ғимарат оқу жағдайын айтарлықтай жақсартып, бастауыш сыныптарға қосымша орындар ашуға мүмкіндік береді. Бұдан бөлек, мұнда екі дайындық сыныбы ашылады.

Қазір арнайы мектепте 313 бала білім алады, оның 207-сі оқу орнына барып оқиды, 106-сы үйде оқытылады. Балалармен 131 педагог, тәрбиеші және дефектолог жұмыс істейді.

«Мектепте 0-ден 11-сыныпқа дейінгі балалар оқиды. Бүгінде 26 сынып жұмыс істейді, оқу екі бағдарлама бойынша жүргізіледі – жеңілдетілген және орта буын бағдарламасы. 18 сынып жеңілдетілген бағдарлама бойынша, 8 сынып орта буын бағдарламасы бойынша оқиды. Балалар мектепте 8:00-ден 17:30-ға дейін болады. Түске дейін пән сабақтары өтеді, түстен кейін тәрбиешілер мен мамандар түзету және дамыту сабақтарын жүргізеді», – деп түсіндірді Дина Трумова.

Облыс әкімі жаңа жапсарлас ғимаратты аралап көрді. Оқу орнының директоры барлық жұмыстың сапалы орындалғанын, бөлмелердің оқу процесіне толық дайын екенін атап өтті. Сыныптарға ерекше білім беру қажеттіліктері бар балаларға арналған бейімделген парталар мен қажетті жабдықтар орнатылған.

Асхат Шахаров ерекше білімді қажет ететін балаларға арналған жаңа білім беру нысандарын салу өңірдің басым бағыттарының бірі екенін алға тартты.

«Әрбір бала үшін сапалы әрі қолжетімді оқу жағдайын жасау біз үшін маңызды. Бұл құрылыс мектептің жүктемесін айтарлықтай азайтып, қосымша сыныптар ашуға және ерекше білім беру қажеттіліктері бар балаларға қолайлы орта қамтамасыз етуге мүмкіндік береді. Біз мұндай жобаларды әрі қарай да қолдаймыз», – деп атап өтті облыс әкімі.

• 24.11.2025
• 13