Премьер-министрдің орынбасары Канат Бозымбаевтың төрағалығымен Жамбыл, Қызылорда және Түркістан облыстарында алдағы вегетация кезеңіне дайындық мәселелері бойынша кеңес өтті. Шаруалар мен жергілікті атқарушы органдарға келесі жылға болжанып отырған су көлемі және су ресурстарының азаюы әсерін жеңілдету шаралары туралы түсіндірдік.

Біздің және Орталық Азия елдеріндегі әріптестеріміздің болжамдары бойынша, алдағы вегетация маусымында су ресурстарының көлемі соңғы жылдармен салыстырғанда азаюы мүмкін. Осыған байланысты Қазақстанның оңтүстік өңірлерінде су жетіспеушілігі тәуекелі бар.

Суды ұқыпты әрі тиімді пайдалануды қамтамасыз ету мақсатында Үкімет бірқатар маңызды шешім қабылдады. Вице-премьер Канат Бозымбаевтың тапсырмасына сәйкес, Қызылорда облысында ауыл шаруашылығы дақылдарын әртараптандыру бағытында арнайы жұмыс тобы құрылады. Су ресурстары және ирригация министрлігі, Ауыл шаруашылығы министрлігі және жергілікті атқарушы орган мамандары алдағы маусымда болжамды су көлеміне қарай ылғалды көп қажет ететін дақылдардың егіс алқаптарын айқындайды.

Түркістан облысында күріш егісін 3,5 мың гектарға дейін қысқарту туралы шешім қабылданды. Сонымен бірге Су ресурстары және ирригация министрлігінің ұсынысына сәйкес, күріш тек «Қызылқұм» каналы бойында және су үнемдеу технологияларын қолдану арқылы ғана егілуі тиіс.

Министрлік пен өзге де жауапты органдар осы жоспардың орындалуын қатаң бақылауда ұстайды. Шаруа қожалықтары жағдайды түсініп, келесі жылы егінсіз қалмас үшін ылғал көп қажет ететін дақылдарды егуге үлкен жауапкершілікпен қарауы керек.

Жамбыл облысында шаруаларға су үнемдеу технологияларын енгізуді ынталандыру жөніндегі мемлекеттік қолдау шаралары түсіндірілді. Сондай-ақ ауыл шаруашылығы дақылдарын әртараптандыру қажеттілігіне ерекше назар аударылды.

Бүгінде министрлік су үнемдеу жүйелеріне тез әрі тиімді көшуге барлық жағдай жасап жатыр. Ұңғымаларды бұрғылау, инфрақұрылым тарту және су үнемдеу жабдықтарын сатып алу шығындарын өтеу үлесі 50%-дан 80%-ға дейін ұлғайтылды. Суармалы суға сараланған тариф енгізілді. Су үнемдеу технологияларын қолданатын шаруашылықтар үшін су құнының субсидиясы 60%-дан 85%-ға дейін артты.

2026-2028 жылдарға арналған жалпы трансферттер шеңберінде су үнемдеу технологияларын енгізуді және егінге қажетті су құнын субсидиялауды қолдауға өткен үш жылдық кезеңмен салыстырғанда төрт есе көп қаражат бөлінді.

Қаржылық ашықтық пен су ресурстарын әділ бөлуді қамтамасыз ету үшін суармалы су беру бойынша электронды келісімшарттар жасасу жүйесі әзірленді. Қазір біздің министрлікке қарасты ұйымдардың мамандары осы жүйемен жұмыс істеуді үйреніп жатыр.

• 10.12.2025
• 4