Әсет Ерғалиев Сенатта жергілікті өзін-өзі басқару мәселелері жөніндегі заң жобасын таныстырды

Палата спикері Мәулен Әшімбаевтің төрағалығымен өткізілген ҚР Парламент Сенаты жанындағы Жергілікті өкілді органдармен өзара іс-қимыл жөніндегі кеңестің отырысында Ұлттық экономика министрі Әсет Ерғалиев аудандық, қалалық және ауылдық деңгейдегі биліктің дербестігі мен жауапкершілігін кеңейту жөніндегі заң жобасына түзетулерді таныстырды.

Ұлттық экономика министрі Әсет Ерғалиевтің айтуынша, аудандық маңызы бар қалалардың, ауылдардың, кенттер мен ауылдық округтердің кіріс базасын кеңейтуді, бюджеттік рәсімдерді жеңілдетуді, сондай-ақ, жергілікті өкілді және атқарушы органдардың дербестігін кеңейту мен жауапкершілігін күшейтуді көздейтін заңнамалық түзетулер ұсынылып отыр.

Жергілікті өзін-өзі басқарудың бюджетін нығайту үшін бюджеттің IV деңгейіне салық пен төлемнің қосымша төрт түрін табыстау ұсынылуда. Бұл бірыңғай жер салығы, жер учаскесін пайдаланғаны үшін төлем, жер учаскелерін сатудан түскен түсім, жер учаскелерін жалдау құқығын сату төлемі. Аылдық округ әкімінің аппараты бюджетіне жоғары деңгейлерге ұқсас 20%-тен аспайтын көлемде түзету енгізу көзделуде.

Бюджет кодексіне аудан мен ауылдық округ бюджеті арасындағы жалпы сипаттағы трансферт көлемін қаржылық жыл ішінде өзгертуге жол бермейтін нақтылау нормасы енгізіледі.

«Осылайша, ауылдық округ әкімдерінің аппараты ауылдық округтердің салық базасын субвенцияларды азайту немесе бюджеттік алуларды ұлғайту қаупінсіз көбейтуге мүдделі болады», - деп атап көрсетті министр.

Мәслихаттардың шешімдерін әділет органдарында тіркеу қажеттілігі жөніндегі норманы алып тастап, ауылдық бюджеттерді бекіту рәсімін оңайлату ұсынылады.

Сондай-ақ, әкімшілік-аумақтық бірліктер санатын өзгерту тәртібін анықтау ұсынылады. Заңнамада белгіленген талаптарға сәйкес келмеген жағдайда қала мәртебесін өзгерту бес жыл ішінде, ал ауылдар үш жыл ішінде жүзеге асырылады.

«Яғни, жергілікті атқарушы және өкілді органдар осы кезең ішінде елдімекендердің экономикалық дамуы үшін оның келешегін ескере отырып, шаралар қабылдауы тиіс», - деп түсіндірді ҰЭМ басшысы.

Түзетулердің жеке пакеті мәслихат пен оның депутаттарының мәртебесін арттыруды көздейді. Атап айтқанда, мәслихат сессиясы төрағасының қызметін таратып, оның өкілеттігін мәслихат хатшысына беру ұсынылады. Сонымен қатар, әрбір облыс пен республикалық маңызы бар қалаларда мәслихаттардың тұрақты комиссиялары төрағаларының босатылған екі лауазымын енгізу ұсынылады.

«Министрлік аудандық маңызы бар қалалардың, ауылдардың, кенттердің, ауылдық округтердің әкімдерін тікелей сайлауды енгізу мәселелері бойынша заң жобаларын әзірледі. Тікелей сайлау жұмыс істеп тұрған әкімдердің өкілеттік мерзімінің аяқталуына қарай жүзеге асырылады және жергілікті бюджет есебінен қаржыландырылады. Ағымдағы жылғы екінші жартыжылдықта тікелей сайлау 836 әкімге қатысты болады», - деді Ұлттық экономика министрі.

• 20.03.2021
• 227