Қазақстанның Энергетика министрлігі Abu Dhabi Sustainability Week іс-шарасына қатысты

Қазақстан Республикасы Энергетика министрлігі Абу-Даби тұрақты даму апталығына (Abu Dhabi Sustainability Week, ADSW) қатысты. Аталған іс-шара тұрақты дамудың жаһандық күн тәртібін ілгерілетуге, сондай-ақ климаттық және экологиялық мақсаттарға қол жеткізуге бағытталған халықаралық күш-жігерді қолдайтын жетекші халықаралық платформалардың бірі болып саналады.

ADSW аясында энергетикалық өтпелі кезеңді жеделдетуде цифрландыру мен жасанды интеллект технологияларының маңызына ерекше назар аударылды. Іс-шара барысында энергожүйелердің тиімділігін арттыру, «ақылды» инфрақұрылымды дамыту және ресурстарды тұтынуды оңтайландыру мәселелері қаралды.
Сонымен қатар, платформа таза және жаңартылатын энергия көздері негізінде жұмыс істейтін деректерді өңдеу орталықтарына инвестициялар тарту мәселелерін талқылауға арналған маңызды алаң болып, бұл цифрлық экономиканы дамытудың негізгі факторларының бірі ретінде қарастырылды және көміртек шығарындыларын азайтуға мүмкіндік береді.

Іс-шараны Біріккен Араб Әмірліктері Үкіметінің қолдауымен Masdar компаниясы ұйымдастырды және оған мемлекет басшылары мен үкімет басшылары, халықаралық ұйымдардың өкілдері, бизнес қауымдастығы, ғылыми орта және сарапшылар қатысады. ADSW аясында энергетикалық өтпелі кезең, декарбонизация, жаңартылатын энергия көздерін дамыту, орнықты экономикалық өсу және инновациялық технологияларды енгізу мәселелері талқыланды.

Абу-Даби тұрақты даму апталығы үздік тәжірибелермен алмасуға, халықаралық ынтымақтастықты нығайтуға және тұрақты даму мен климаттың өзгеруіне қарсы күрес саласында бірлескен шешімдер әзірлеуге арналған маңызды халықаралық алаң саналады. Ауқымды шараға Қазақстан Республикасы Энергетика вице-министрі Бақытжан Ілияс қатысты.

Қазақстан Республикасы Энергетика министрлігі энергетика саласын тұрақты дамытуға, «жасыл» технологияларды енгізуге, сондай-ақ энергетикалық қауіпсіздік пен орнықты даму жолында халықаралық ынтымақтастықты нығайтуға бағытталған осындай халықаралық бастамаларға қатысудың маңыздылығын атап өтеді.

• 16.01.2026
• 6