Ақтөбені дамыту үшін бірыңғай дизайн-код әзірленеді

Бұл дизайн-код қаланың сәулеттік келбетін сақтауға, оның тарихи және мәдени ерекшеліктерін айқындауға, сондай-ақ қалалық ортаны заманауи, қолайлы және тұрғындар үшін тартымды етуге мүмкіндік береді.

Облыс әкімі Асхат Шахаровтың төрағалығымен өткен отырыста қаланың сәулеттік келбетін жақсарту және тұрғындар үшін жайлы қалалық орта қалыптастыру шаралары талқыланды.

Қала әкімі Азамат Бекеттің мәліметінше, 2025 жылы аумақтарды абаттандыру және көгалдандыру бойынша ауқымды жұмыстар жүргізілді: жаяу жүргіншілер жолдарына жаңа тас төсемелер төселді, «Таза Қазақстан» республикалық акциясы аясында биіктігі 3–5 метрлік ағаштар отырғызылды, орталық көшелер бірыңғай жылы жарықпен жарықтандырылды.

Сонымен қатар, демеушілер мен кәсіпкерлердің бастамасы есебінен 15 қоғамдық кеңістік жасалып, бұл қала тұрғындары үшін экологиялық әрі қауіпсіз орта қалыптастыруға мүмкіндік берді. Мобильді топтар қала сәулеттік келбетіне нұқсан келтірген 58 заңсыз сауда павильоны мен 211 жарнама құрылымын бұзды, сондай-ақ көпірлердегі қоршаулар мен қауіпсіздік жүйелерін жаңарту жоспарланған.

Қала әкімінің айтуынша, 2026 жылғы 1 наурызға дейін қаланың даму жоспарларына өзгерістер енгізу, атап айтқанда, ғимараттардың қасбеттерін жаңарту, қоғамдық кеңістіктерді абаттандыру, шағын сәулеттік нысандарға, навигацияға, жарықтандыруға және көше жиһазына арналған бірыңғай стандарттар орнату, сондай-ақ ландшафтық дизайн жоспарын және көгалдандыру сапасының стандарттарын әзірлеу қажет. Астана қаласының тәжірибесі негізінде дизайн-кодты, белсенді көгалдандыруды және қаланың брендбугін енгізудің тиімділігін көрсетіпті, танымал әрі тартымды сәулеттік келбет қалыптастыруға мүмкіндік бергенін дәлелдеген.

Өңір басшысы Асхат Шахаров Ақтөбе қаласының әкімдігіне барлық жаңа және қолданыстағы нысандар үшін міндетті талап ретінде бірыңғай дизайн-кодты әзірлеп, бекітуді тапсырды. Құжат қаланың тұтас келбетін сақтауды, оның тарихи және сәулеттік ерекшеліктерін ескеруді және заманауи, жайлы әрі тартымды қалалық ортаны қалыптастыруды қамтамасыз етуі тиіс.

«Ақтөбенің сәулеттік келбетін жақсарту және бірыңғай дизайн-кодты енгізу – бұл сыртқы көріністі реттеу ғана емес, заманауи әрі жайлы қалалық орта құрудың құралы. Қалада бей-берекет жарнама, әртүрлі қасбеттер мен келісілмеген маңдайшалар болмауы тиіс. Дизайн-кодты енгізу жұмысы кезең-кезеңімен жүргізілуі қажет: алдымен орталық көшелер мен қоғамдық кеңістіктер, кейін тұрғын аудандар. Сонымен қатар кәсіпкерлермен жүйелі жұмыс ұйымдастырып, талаптарды орындаудың нақты мерзімдерін белгілеу қажет. Дизайн-код талаптарының сақталуын бақылау тұрақты сипатта болуы тиіс: жауапты құрылымды айқындау, талаптардың орындалуын жүйелі түрде мониторингтеу және тәжірибені аудан орталықтарына тарату қажет», – деп тапсырды аймақ басшысы.

• 23.01.2026
• 9