Жас қазақстандықтардың шотына 130,71 доллардан аударылды

«Ұлттық қор – балаларға» мемлекеттік бағдарламасы жас отандастарымызға кәмелет жасқа толған кезде білім алуға немесе тұрғын үй мәселесін шешуге бағытталған бастапқы қаржылық капиталмен қамтамасыз етеді. Естеріңізге сала кетейік, бағдарлама Қазақстан Президенті Қасым-Жомарт Тоқаевтың бастамасымен ұлттық байлықты әділ бөлу қағидатын іске асыруға арналған.

Оның аясында өткен аптада әр қазақстандық балаға 130,71 доллардан аударылды. 2026 жылы бағдарламаға 2008-2025 жылдар аралығында туған 6 918 656 бала қатысты. Осылайша, бағдарламаның әрбір қатысушысы 2026 жылы 130,71 доллардан иеленді.

2026 жылы кәмелет жасқа толатын 356 613 адамға 44,5 млн доллар көлемінде жиынтық аударым қарастырылған.

Бағдарламаға іске қосылған сәттен бастап қатысып келе жатқан балалардың шотына үш жылдағы (2024-2026 жылдар) инвестициялық кірісті ескере отырып жинақтардың жалпы сомасы әрқайсысына 370,56 доллардан келеді.

«Ұлттық қор – балаларға» бағдарламасымен жинақталатын қаражат өмірлік маңызды міндеттерді шешу үшін пайдаланылады. Негізгі бөлігі (19,7 миллион доллар) мақұлданған 127 446 өтінім бойынша тұрғын үй жағдайын жақсартуға бағытталды. Ал 78 060 өтінім бойынша балалардың білім алуына тағы 11,9 млн доллар салынды.

• 03.02.2026
• 9