Бюджет саясатының жаңа қағидаттары

Мемлекет басшысы Қасым-Жомарт Тоқаев Үкіметтің кеңейтілген отырысында министрлер кабинетінің алдына жаңа міндеттер қойды. Айталық, биыл 1 мамырға дейін барлық бюджеттік бағдарламаға аудит жүргізілуі тиіс. «Бюджетті игеру» принципі келмеске кетеді. Нәтижелік – мемлекеттік инвестицияларды жұмсаудың басты өлшеміне айналады.

Бұл ретте Қаржы министрлігі жобаларды іріктеу тетіктерін қайта қарауға кіріскенін айта кетейік. Енді қаржыландыруға тек тиімділік бағалауынан өткен бастамалар ғана ие болады. Әлеуметтік салаға ерекше мән беріледі. Ал 2026 жылдың 1 желтоқсанына қарай Бірыңғай мемлекеттік медициналық ақпарат жүйесі жолға қойылады. Бұл денсаулық сақтау саласындағы алаяқтық схемаларды тежеп, медициналық қызметтердің ашықтығын арттырады.

Қасым-Жомарт Кемелұлы биылдан бастап күшіне енген Салық кодексінің алғашқы нәтижелері туралы да айтып өтті. Президенттің айтуынша, салық реформасы экономиканың ашықтығын нығайтып, бюджеттің кірісін ұлғайтуға оң әсер етіп келеді. Мемлекет басшысы жаңа салық-бюджет саясаты теңгерімді болып, экономиканың орнықты дамуына және азаматтардың әл-ауқатын арттыруға бағдарлануы тиіс екенін жеткізді. Салық кодексі ашықтық пен тәртіпті күшейтуге ықпалын тигізетін ынталандыру тетіктерін дамытуды көздейді.

Сондай-ақ Президент бюджетті толықтырудың әлеуетті резерві ретінде тиімді салықтық әкімшілендіру мен цифрландыруды атап өтті. Осы орайда біздің ведомство енгізген цифрлы шешімдер қазір тиімді жұмыс істеп тұрғанын айта кеткен орынды. Мысалы, Keden ақпарат жүйесі салық жинауды арттырып, көлеңкелі айналымды азайтуға септесіп келеді.

Бұдан бөлек Қасым-Жомарт Тоқаев басқарудың барлық вертикаль жүйесі халықтың табысын арттыру мен өзекті мәселелерді жедел шешуге жұмыс істеуі керек екенін айтты. Қаржыландыруды тек жоғары рентабельді және әлеуметтік маңызы бар жобалар алуы қажет. ҚР Қаржы министрлігі алға қойылған міндеттерді іс жүзінде орындау үшін бар күш-жігерін жұмылдырады.

• 14.02.2026
• 9