Цифрландыру, салықтар және бизнесті қолдау

Қаржы министрлігінде кеңейтілген алқа отырысы өткізіліп, онда 2025 жылдың қорытындылары шығарылып, биылға арналған негізгі басымдықтар айқындалды. Бұл ретте ведомствоның негізгі нәтижелері мен біздің алдымызда тұрған жоспарларды жеткізуді орынды деп санаймын.

Ең әуелі біздің барлық күш-жігеріміз Мемлекет басшысы Қасым-Жомарт Тоқаев белгілеген стратегиялық бағытты іске асыруға бағытталғанын атап өткім келеді. Бүгінде Қазақстанда жаңа Конституцияның жобасы талқыланып жатыр. Ата заңның жаңа мәтінінде адам және адами капиталды дамыту негізгі темірқазық ретінде айқындалған.

Барлық сын-тегеурінге қарамастан еліміз 2025 жылды айтарлықтай көрсеткіштермен сәтті аяқтады. Мемлекеттік бюджеттің кірістері бойынша жоспар 100,1% орындалды: жоспарға сәйкес 24 593,7 млрд теңге межеленіп, іс жүзінде 24 621 млрд теңге түсті. Артығымен орындалған қаражаттың мөлшері – 27,3 млрд теңге. 2024 жылмен салыстырғанда кіріс 3 трлн теңгеге ұлғайды.

2026 жылдың 1 қаңтарынан бастап жаңа Салық кодексі күшіне енген болатын. Біз кез келген өзгеріске бейімделу үшін уақыт қажет екенін жақсы түсінеміз. Сондықтан біз «таза парақтан» тетігін іске қостық – бұл микро және шағын бизнеске арналған бір реттік акция. Ол негізгі берешекті төлеу шартымен жеңілдетілген таратуды, өсімпұлдар мен айыппұлдарды есептен шығаруды көздейді. Бір мезетте 2026 жылғы 1 қаңтарға дейінгі кезең бойынша тексерулерге уақытша мораторий енгізілді. Бұл шаралар бизнеске жұмысты таза парақтан бастауға және салық міндеттемелерін ерікті түрде орындауға мүмкіндік береді.

2026 жыл цифрлы трансформация мен қаржыны ашық басқарудың маңызды кезеңі болады. Қаржы министрлігі бюджеттің кіріс бөлігін орындау, салық және кедендік әкімшілендіруді жетілдіру бойынша кешенді жұмысты жалғастырады.

• 27.02.2026
• 3