Нұрдәулет Қилыбай Қазақстандағы БҰҰ балалар қоры – UNICEF өкілімен кездесті

26 ақпанда Маңғыстау облысының әкімі Нұрдәулет Қилыбай Қазақстандағы БҰҰ Балалар қорының (ЮНИСЕФ) өкілі Рашед Мустафа Сарвармен кездесті. Кездесу барысында балалар мен жастардың әл-ауқатын арттыру, цифрландыру және жастардың қоғамдық өмірге қатысуын кеңейту мәселелері талқыланды.

Жиында өңірде балалардың құқығын қорғау, олардың қауіпсіздігі мен дамуына қолайлы жағдай жасау бағытында атқарылып жатқан жұмыстардың барысы сөз болды. Сондай-ақ балалардың әл-ауқатын бақылауға арналған цифрлық шешімдерді енгізу және «жасыл» дағдыларды дамыту мәселелеріне назар аударылды.

Сонымен қатар кездесуде әуежайлар мен кеден бекеттерінде аналар мен балаларға қолайлы жағдай жасауға бағытталған жобаны іске асыру мәселесі қозғалды. Атап айтқанда, ана мен балаға арналған арнайы бөлмелер, демалыс аймақтары және қолайлы инфрақұрылым қалыптастыру арқылы олардың қауіпсіздігі мен жайлылығын арттыру жолдары талқыланды.

Өңір басшысы Маңғыстау облысының болашақ ұрпаққа бағытталған тұрақты даму моделін қалыптастыруға мүдделі екенін атап өтті.
 

– Балалар мен жастарды қолдау – біздің басты басымдықтарымыздың бірі. Осы бағытта халықаралық ұйымдармен бірлесіп жұмыс істеу өңірдің әлеуметтік әлеуетін арттыруға мүмкіндік береді. Әрбір бала мен жас өз туған өлкесінде сапалы білім алып, жан-жақты дамуына мүмкіндік табуға тиіс, – деді Нұрдәулет Қилыбай.

Өз кезегінде Рашед Мустафа Сарвар ЮНИСЕФ-тің өңірдегі бастамаларды қолдауға дайын екенін айтып, жастар көшбасшылығын нығайтудың маңыздылығына тоқталды.

Бұдан бөлек, кездесу барысында жастардың жұмыспен қамтылуын арттыру, «жасыл» мамандықтарды дамыту, еріктілер қозғалысын қолдау және NEET санатындағы жастармен жұмыс істеу мәселелері де қаралды. Сонымен қатар алдағы уақытта бірлескен жобаларды жүзеге асыру мүмкіндіктері талқыланды.

Маңғыстау облысы әкімінің баспасөз қызметі

• 27.02.2026
• 7