Маңғыстау облысында ЮНИСЕФ Жастар хабы ашылды

Маңғыстау облысындағы Ш. Есенов атындағы Каспий технологиялар және инжиниринг университетінің базасында ЮНИСЕФ Жастар хабы салтанатты түрде ашылды. Бұл жаңа алаң өңір жастарының еріктілік қызметін, әлеуметтік бастамаларын және көшбасшылық қасиеттерін дамытудың орталығына айналмақ, деп хабарлайды Қоғамдық коммуникация орталығы.

Ашылу рәсіміне Маңғыстау облысы әкімінің орынбасары Аббат Өрісбаев, университет басшылығы, ЮНИСЕФ өкілдері, еріктілер мен жас көшбасшылар қатысты.

Хабтың ашылуы Қазақстан Республикасының Президенті Қасым-Жомарт Тоқаевтың тапсырмасы бойынша жарияланған Халықаралық еріктілер жылы аясында өтіп отыр.

Өңірдегі бұл жоба Маңғыстау облысының әкімі Нұрдәулет Қилыбаевтың бастамасымен жүзеге асырылды және жастар саясатын қолдауға, еріктілер қозғалысын дамытуға бағытталған.

Маңғыстау облысы әкімінің орынбасары Аббат Өрісбаев хабтың өңір жастары үшін маңыздылығын атап өтті.

-ЮНИСЕФ Жастар хабының ашылуы - өңірдегі еріктілік қызметті дамытудағы маңызды қадам. Біз бұл хабты әлеуметтік бастамаларды жүзеге асыру, көшбасшылық қасиеттерді шыңдау және жастардың облыс өміріне белсенді қатысуы үшін тиімді алаң ретінде қарастырамыз. Алдағы уақытта жастардың өзін-өзі таныту мүмкіндіктерін кеңейтуге бағытталған жаңа жобаларды іске қосу жоспарлануда, - деді Аббат Өрісбаев.

ЮНИСЕФ-тің Қазақстандағы өкілі Рашед Мустафа Сарвар өз кезегінде хабтың жастар үшін мүмкіндіктер орталығына айналатынын және мұнда балалардың өмір сүру сапасын жақсартуға бағытталған жобалар іске асатынын ерекше атап өтті.

2026 жылы өңір еріктілері онлайн-курстар мен бастамаларды дамытуға арналған құралдары бар «UNICEF Zhastary» ұлттық цифрлық платформасына қол жеткізеді. Ақтаудағы хабтың ашылуы Маңғыстау облысында жастардың қатысуының тұрақты экожүйесін қалыптастыру жолындағы кезекті қадам болды.

• 27.02.2026
• 7