Түркістан облысының тұрғындарымен есептік кездесу өткізіп, министрліктің алдағы суару кезеңінің тұрақты өтуін қамтамасыз ету бағытында жүзеге асырып жатқан жұмыстары туралы баяндадым.

2028 жылға дейінгі су саласын дамыту жөніндегі кешенді жоспарға сәйкес, Түркістан облысында төрт жаңа су қоймасын салу көзделген. Қазіргі таңда «Бәйдібек ата» және «Қарақуыc» су қоймаларының құрылысы аяқталуға жақын. Ал «Иқан-су» және «Боралдай» су қоймаларының жобалау-сметалық құжаттамасы әзірленіп жатыр.

Сондай-ақ өңірде ирригациялық каналдарды жөндеу және реконструкциялау бойынша төрт жоба аяқталды. Соның нәтижесінде 24,5 мың гектардан астам суармалы жер сумен қамтамасыз етілді. Ал жыл басынан бастап Қазақстанның оңтүстік облыстарында 115 каналды жаңғырту және 103 каналды автоматтандыру жұмысы басталды.

Былтырғы суару кезеңі аграрлық сектордың тиімділігі су ресурстарын қаншалықты дұрыс және жауапкершілікпен басқаруға байланысты екенін көрсетті. Бұл тек нақты жоспарлауды ғана емес, су саласын дамытудың жүйелі тәсілін де талап етеді. Сондықтан біздің жұмыстың басым бағыттарының бірі - су шаруашылығы инфрақұрылымын жөндеу және жаңғырту. Қазіргі уақытта жүзеге асырылып жатқан ірі жобалар су пайдаланудың тиімділігін арттыруға және судың шығынын азайтуға мүмкіндік береді.

• 30.03.2026
• 9