МАҢҒЫСТАУДА 2 АПТАДА 16 ОҚУШЫДАН «COVID-19» АНЫҚТАЛДЫ

15 мен 30 наурыз аралығында Маңғыстау обылсы бойынша мектеп оқушыларының арасында коронавирус инфекциясын жұқтырған 16 жағдай, мұғалімдер арасында 6 жағдай тіркелді. Бұл туралы Қоғамдық коммуникация орталығында өткен брифингте Маңғыстау облысы санитариялық- эпидемиологиялық департаментінің басшысы Ғазиз Надуев мәлім етті. Оның айтуынша, мектеп оқушылары арасында Ақтау қаласы бойынша №13, 20, 6, 12, 21, 23, 5, 6, 15 мектепте және Назарбаев зияткерлік мектебінде, Мұнайлы ауданы бойынша Қызылтөбе лицейінен 2 жағдай анықталды. Олардың ішінде 9 оқушы оффлайн, 7-еуі онлайн режимде оқиды.
 
 «Анықталған 16 оқушының 15-і үйдегі қарым-қатынас арқылы, 1 оқушы жедел отаға дайындық барысында анықталып отыр. Ауырған оқушылардың барлығының шағымы жоқ. Қазіргі уақытта 16 оқушының сыныптары үй карантиніне алынды»,-деді Ғазиз Надуев.

Бұдан бөлек Маңғыстау облысы санитариялық- эпидемиологиялық департаментінің басшысы эпидемиологиялық ахуалдың қазіргі деңгейіне тоқталды. 

«Инфекция жұқтырғандардың 65%-ы тығыз қарым-қатынаста болған ошақтарда байқалып отыр. Бұл дегеніміз адамдар эпидемияға қарсы ошақтарда сақтық шараларын қадағаламай  ауырып жатқандарын көріп отырмыз. Қазіргі уақытта аурушаңдықтың салыстырмалы көрсеткіші Ақтау қаласында өсім беріп отыр. Аудандардың ішінде ең төмен көрсеткіш Бейнеу мен Қарақия ауданында болып отыр»,-деді Ғазиз Надуев. 

Эпидемиологиялық талдау бойынша Ақтау қаласында ауру деңгейінің көрсеткіші жоғары. Нақты тоқталсақ:
1. Ақтау қаласы 2542  жағдай-  көрсеткіш 911,4 (57,8%)
2. Бейнеу ауданы 433 жағдай - көрсеткіш 632,2 (10,1%)
3. Мұнайлы ауданы 423 жағдай - көрсеткіш 298,3 (9,6 %)
4. Жаңаөзен қаласы бойынша 323 жағдай - көрсеткіш 227,1 (7,3%)
5. Маңғыстау ауданы 286 жағдай көрсеткіш 821,0 (6,5%)
6. Түпқараған ауданы 234 жағдай – көрсеткіш 691,0 (5,3 %)
7. Қарақия ауданы бойынша 155 жағдай–көрсеткіш  422,0 (3,6%)

Маңғыстау облысында соңғы репродуктивті көрсеткіш 0,77. 

• 01.04.2021
• 233