Шалқардағы бұрынғы бос аумақ енді халық серуендейтін саябаққа айналады

Шалқар ауданына жұмыс сапары барысында облыс әкімі Асхат Шахаров Шалқар көлінің жағалауында салынып жатқан жаңа саябақтың құрылысымен танысты.

Жобаны «Строй Мунай Сервис» ЖШС мердігер ұйымы жүзеге асыруда. Құрылыс жұмыстарының құны 377,8 млн теңгені құрайды. Саябақты жаз ортасында пайдалануға беру жоспарланып отыр.

Қазіргі таңда болашақ демалыс аймағында алаңды тегістеу және жиектастар орнату жұмыстары аяқталған. Спорт алаңдарына қиыршық тас төсеу, сондай-ақ көшені жарықтандыру жүйесін орнату жұмыстары жалғасуда. Нысанның құрылыс дайындығы шамамен 30 пайызды құрайды.

Облыс әкімінің айтуынша, жоба ауданның табиғи-климаттық ерекшеліктерін ескере отырып әзірленген және Шалқар тұрғындары мен қонақтары үшін жайлы қоғамдық кеңістік қалыптастыруға бағытталған.

«Шалқарда табиғи жағдай күрделі болғандықтан, тұрғындардың көбі көгалдандыру мен саябақ аймағын құру жобасына алғашында сенімсіздікпен қарады. Алайда жобаны әзірлеу кезінде барлық климаттық ерекшелік ескеріліп, жергілікті табиғатқа бейімделе алатын өсімдіктер таңдалды. Жақын арада мұнда әдемі әрі заманауи демалыс орны пайда болады. Екі жыл бұрын біз бұл жерде болғанда, аумақ мүлде басқаша көрінетін», — деді Асхат Шахаров.
Құрылыс аяқталғаннан кейін саябақ ауданның жаңа тартымды орындарының біріне айналып, отбасылық демалысқа арналған танымал мекен болады деп күтілуде.

• 25.05.2026
• 1