Атырау облысына жұмыс сапарым кезінде жаңбырлатып суару машиналарын өндіруге маманданған «KazGrow Irrigation Systems» ЖШС-нің жұмысымен таныстым.

Кәсіпорында шамамен 50 адам еңбек етеді. Зауыттың өндірістік қуаты жылына 100-150 жаңбырлатып суару машинасын шығаруға мүмкіндік береді. Бұл өз кезегінде жыл сайын 8-10 мың гектар алқапты суарумен қамтуға жағдай жасайды.

Атырау облысында 10,1 мың гектар аумақта жаңбырлатып және тамшылатып суару жүйелері пайдаланылып жатқанын айта кетейін. Бұл - өңірдегі жалпы егіс алқабының үштен екісінен астамы. Биыл су үнемдеу технологиялары қосымша 800 гектар жерге енгізілді.

Жыл сайын су үнемдеу технологиялары қолжетімді болып келеді. Заманауи жаңбырлатып және тамшылатып суару жүйелерін шығаратын жаңа зауыттар салынып жатыр. Мемлекет өз тарапынан бұл технологияларды енгізуді ынталандыруға бағытталған қолдау шараларын жүзеге асырып келеді. Атап айтқанда, шаруалардың су үнемдеу жүйелерін сатып алу және орнату шығындарын өтеу үлесі 50%-дан 80%-ға дейін ұлғайтылды. Сонымен қатар суару суына берілетін субсидиялар сараланған тәртіппен төленеді: су үнемдеу технологияларын қолданған жағдайда субсидия көлемі 85%-ға дейін жетеді. 2026-2028 жылдары су үнемдеу технологияларын енгізуге жұмсалатын шығындарды инвестициялық субсидиялауға 214,6 млрд теңге қарастырылған. Бұл алдыңғы үш жылдың қаржыландыру көлемінен төрт есе көп. Қазіргі таңда заманауи суару жүйелеріне көшу үшін барлық жағдай жасалып жатыр.

Индер ауданында ұзындығы шамамен 52 шақырым болатын «Құрайлы сай» каналын реконструкциялау жұмыстарымен таныстым. Жоба аясында каналды механикалық тазарту, көпірлерді жөндеу, құбырлар тарту, мал суаратын орындар мен шлюз-регулятор орнату, гидробекет салу, сондай-ақ сорғы станциясындағы электр желілері мен жабдықтарды жаңарту жұмыстары көзделген.

Жобаны жыл соңына дейін аяқтау жоспарланып отыр. Каналды реконструкциялау нәтижесінде 48 мың гектар жерге су жеткізу сапасы жақсарып, Атырау облысында суармалы егіншілік пен мал шаруашылығының дамуына серпін береді.

• 08.06.2026
• 5