Қазақстанда көмір өнеркәсібін дамыту жоспары әзірленеді

Қазақстан Республикасы Энергетика министрі Ерлан Ақкенженов Қазақстанның VII Көмір өнеркәсібі форумында сөз сөйлеп, «Көмір генерациясын дамыту» ұлттық жобасының негізгі бағыттары мен энергетика секторын ұзақ мерзімді отынмен қамтамасыз ету шараларын таныстырды.

Форумды аша отырып, ведомство басшысы көмір өнеркәсібі ұлттық энергетикалық қауіпсіздікті қамтамасыз ететін, өндірістік алаңдардың үздіксіз жұмысын қолдайтын және халықты жұмыспен қамтитын макроэкономиканың негізгі салаларының бірі болып қала беретінін атап өтті. Электр энергиясын тұтынудың қарқынды өсуі, урбандалу және жаңа энергияны көп қажет ететін жобалардың іске асырылуы жағдайында мемлекеттің өз базалық генерациясының болуы стратегиялық маңызға ие.

Ұлттық жоба аясында жаңа көмір жылу электр станцияларын салу және қолданыстағы қуаттарды терең жаңғырту көзделген. Реформаның басты бағыты – заманауи экологиялық шешімдерді енгізу. Осы мақсатта көмір энергетикасында ең үздік қолжетімді технологиялар (ҮҚТ) қолданылатын болады.

«Көмір саласы елімізге тұрақты әрі сенімді базалық генерация береді. Мемлекет бұл секторды жаңа техникалық стандарттарға көшіруде. Отынды тазартудың озық экологиялық технологияларын енгізу және логистикалық үдерістерді тиімді үйлестіру көмір негізіндегі энергетикалық жүйенің сенімді әрі болжамды жұмысын қамтамасыз етеді», – деді Қазақстан Республикасының Энергетика министрі Ерлан Ақкенженов.

Министр өз сөзінде генерация көлемінің тұрақты өсуі ең алдымен отынмен қамтамасыз етілу деңгейіне тәуелді екенін атап өтті. Қуаттарды дамыту көмір өндіруші кәсіпорындардың инвестицияларымен, көлік инфрақұрылымын жаңғыртумен және тасымалдаушылар логистикасымен қатар жүруі тиіс.

Осы міндеттерді жүйелі түрде іске асыру үшін Үкімет көмір өнеркәсібін дамытудың бірыңғай жоспарын әзірлеуді тапсырды. Бұл құжат жылу электр орталықтарын, бизнесті және халықты қажетті көлемдегі отынмен тұрақты қамтамасыз етудің негізгі тетігіне айналады.

Жоспардың негізін көмір тұтынудың ұзақ мерзімді болжамы, теміржол арқылы тасымалдаудың тұрақтылығын арттыру, өнеркәсіптік қауіпсіздікті күшейту, отандық кадрлық әлеуетті дамыту және көмірді терең өңдеу (көмір химиясы) жобаларын ынталандыру секілді нақты бағыттар құрайды.

Сондай-ақ саланы цифрландыруға ерекше назар аударылады. Атап айтқанда, көмір өндіру мен вагондарға тиеуді онлайн бақылау жүйелерін енгізу, сондай-ақ электр станцияларын отынмен қамтамасыз ету бағыттарындағы көлік кептелістерін алдын ала болжау үшін заманауи IT-шешімдерді пайдалану жоспарланып отыр.

Ерлан Ақкенженов жаңа Ұлттық жобаны табысты іске асыру мемлекеттік органдардың, жер қойнауын пайдаланушылардың, энергетикалық кәсіпорындардың және логистикалық операторлардың үйлесімді әрі экономикалық тұрғыдан тиімді серіктестігі жағдайында ғана мүмкін екенін атап өтті.

Қазақстанның VII Көмір өнеркәсібі форумы елдің отын қауіпсіздігін қамтамасыз етуге бағытталған нақты әрі тиімді шешімдерді әзірлеуге арналған басты кәсіби B2B алаңына айналды.

• 12.06.2026
• 6