Құрметті отандастар! Сіздерді Астана күнімен құттықтаймын!

Астана – Тәуелсіз Қазақстанның символы, еліміздің болашағы айқындалатын, стратегиялық шешімдер қабылданып, ауқымды мемлекеттік реформалар жүзеге асырылатын қала.

Биылғы мерекенің маңызын Қазақстан Республикасының жаңа Конституциясы мен елорданың мәртебесі туралы жаңа Конституциялық заңның күшіне енуі ерекше арттыра түсті. Бұл тарихи шешімдер мемлекет дамуының жаңа кезеңін бастап, Астананың еліміздің басты саяси, әкімшілік, экономикалық және қоғамдық орталығы ретіндегі рөлін нығайтады, конституциялық реформаларды жүзеге асыру мен Әділетті Қазақстанды құрудағы айрықша маңызын айқындайды.

Бүгінде елордамыз инновацияларға, инвестицияларға және жаңа мүмкіндіктерге ашық заманауи мегаполис ретінде қарқынды дамып келеді. Мұнда тұрақты экономикалық өсудің негізі қаланып, Қазақстанның халықаралық беделі нығайып, азаматтардың әл-ауқатын арттыруға қолайлы жағдайлар жасалуда.

Баршаңызға зор денсаулық, бақ-береке, бейбіт өмір мен татулық тілеймін. Астана әрдайым бірлік пен жасампаздықтың, өрлеу мен прогрестің символы болып, еліміз жаңа жетістіктерге қарай нық қадам баса берсін!

Астана күні құтты болсын!

• 06.07.2026
• 6