Түркістан қаласында өткен Орталық Азияның Мемлекетаралық су шаруашылығын үйлестіру комиссиясының (МСШҮК) 94-отырысына қатыстым.

Тәжікстан, Түрікменстан және Өзбекстандағы әріптестеріммен бірге 2026 жылғы вегетация кезеңіне арналған Сырдария және Әмудария өзендері бассейндеріндегі су қоймаларының жұмыс режимдері мен су бөлу лимиттерін қарадық. Сонымен қатар Сырдария өзені бассейнінде су ресурстарының есебін жүргізудің автоматтандырылған жүйесін енгізу жоспарының жобасын әзірлеу мәселесін талқыладық. Қырғыз тарапы бақылаушы мемлекет ретінде қатысты. Отырыс қорытындысы бойынша құжатты әзірлеу мақұлданды. Биылғы қыркүйекке дейін осы мәселе бойынша арнайы жұмыс тобын құру жоспарланып отыр.

Сондай-ақ Дүниежүзілік банкпен бірлесіп жүзеге асырылып жатқан Орталық Азия елдерінің су ресурстарын тиімді пайдалану бойынша өңірлік ынтымақтастыққа арналған гранттық жобаның (CAWEC) іске асырылу барысын да қарастырдық. Күн тәртібіндегі тағы бір мәселе - Халықаралық Аралды құтқару қорының құрылтайшы мемлекеттері басшылары кеңестерінің шешімдерінен туындайтын міндеттердің орындалуы болды.

Мемлекетаралық су шаруашылығын үйлестіру комиссиясы көп жыл бойы Орталық Азиядағы су шаруашылығы саласындағы шешімдерді келісуге арналған негізгі кәсіби алаң болып келеді. Дәл осы жерде Сырдария мен Әмудария өзендері бассейндерінің трансшекаралық су ресурстарын бірлесіп басқарудың тиімді тәсілдері әзірленіп, өңір мемлекеттерінің мүдделер теңгерімі мен алдағы кезеңдегі су пайдаланудың тұрақтылығы қамтамасыз етіледі.

МСШҮК-ның үйлесімді жұмысының арқасында биыл Шардара су қоймасына тұрақты су келуі қамтамасыз етілгенін айта кету керек. 2026 жылғы 1 сәуірден бері су қоймасына шамамен 3 млрд текше метр су түсті. Бұл өткен жылдың және көпжылдық орташа көрсеткіштерден жоғары. Вегетация кезеңі аяқталғанға дейін су келуі жалғасады деп күтіліп отыр. Сырдария өзені бассейніндегі су шаруашылығы жағдайы тұрақты. Ауыл шаруашылығы қажеттіліктері үшін су штаттық режимде беріліп жатыр.

Орталық Азияның Мемлекетаралық су шаруашылығын үйлестіру комиссиясының келесі, 95-отырысы Түрікменстанда өтеді.

• 10.08.2026
• 4