Ғазиз Байтасовтың ерлігін ешқашан ұмытпаймыз

Биыл батыр-полицей, Халық Қаһарманы Ғазиз Байтасовтың қаза болғанына 10 жыл толады. Егер тірі болса, 3 сәуірде Ғазиз 50 жылдық мерейтойын атап өтетін еді…

Осы айтулы күнге орай, туған қаласы – Таразда батырдың құрметіне ескерткіш салтанатты түрде ашылды. Рәсімге марқұмның әріптестері, достары, сондай-ақ отбасы мүшелері – жұбайы Гүлжамал және ұлдары Арманжан мен Әділжан қатысты.

Полиция капитаны Ғазиз Байтасов 1971 жылы 3 сәуірде Жамбыл қаласында дүниеге келген. Мектептен кейін әскер қатарында болып,  Жезқазған политехникалық университетінің Қаратау филиалында жоғары білім алады. 1993 жылы полицияға жұмысқа қабылданды және сол уақыттан бастап қоғамдық қауіпсіздік пен құқық тәртібін қорғау күзетінде  адал қызмет етті.

Сол қайғылы оқиға болатын күні таңертең Жамбыл облысы ІІД Жол полициясы жеке батальонының 1 взводының командирі Ғазиз Байтасов Тараздың орталық көшелерінің бірінде оқ жаудырған террористі ұстауға шығады. Оқ тиіп жараланса да, лаңкестің соңынан өкшелеп қуа береді. Капитан Ғазиз Байтасов оңтайлы сәтте лаңкеске тап беріп, оның қолындағы гранатаны кеудесімен жапты, сөйтіп бейбіт адамдардың өміріне қорған болды. Ол өз өмірін құрбандыққа шалып, көп адамды құтқарып қалды.

Ғазиз Байтасовтың өмір жолы мен ерлігі біздің жүрегімізде  мәңгі сақталады. Нағыз патриот, халықтың қайсар ұлы, Халық Қаһарманы Ғазиз Байтасов – полицейдің жұмысымен тығыз байланысты ерлік пен батырлықтың үлгісіне айналды.

Біз оның адамдарды өлімнен құтқарып, азаматтардың қауіпсіздігі мен тыныштығын сақтау және Отанымыздың одан әрі гүлденуі үшін жасаған ерлігін ешқашан ұмытпаймыз.

• 06.04.2021
• 279