Түркістан облысына жұмыс сапарым аясында «Бәйдібек ата» су қоймасының құрылысы қалай жүріп жатқанымен таныстым.

Сыйымдылығы 68 млн текше метр болатын нысан көктемгі кезеңде Бөген өзенінің ағын суын жинақтап, вегетация кезеңінде ауыл шаруашылығы тауарын өндірушілердің қажеттіліктері үшін қосымша су көлемін Бөген су қоймасына тиімді бағыттайды. Қазіргі уақытта жоба бойынша жұмыстардың 86%-ы орындалды.

«Бәйдібек ата» су қоймасының жалпы аумағы 220 гектар. Бөгеттің ұзындығы – 3 900 метр. Жобаны іске асыру 9 700 гектар суармалы жерге су беруді жақсартуға мүмкіндік береді.

Жауапты тұлғаларға жүргізіліп жатқан барлық жұмыстардың талапқа сай әрі сапалы орындалуын қамтамасыз етуді тапсырдым. Бұл жоба Түркістан облысының су қауіпсіздігін қамтамасыз ету және өңірдегі ауыл шаруашылығын дамыту үшін аса маңызды.

Сонымен қатар еліміздің басқа өңірлерінде де су қоймаларын салу жобалары қатар жүзеге асырылып жатыр. Бұл жұмыстар Қазақстандағы су ресурстарын басқару тиімділігін арттырудың берік негізі болмақ.

Еске сала кетсем, биыл сыйымдылығы 1,2 млн текше метр болатын «Қарақуыс» су қоймасының құрылысы аяқталды. Нысан Түркістан облысының Төлеби ауданында орналасқан және 500 гектар суармалы алқапты ағын сумен қамтамасыз етуге арналған.

Бұдан бөлек, Ислам даму банкімен бірлесіп үш жаңа су қоймасын салу жобаларын іске асыру басталды. Олар – Жамбыл облысындағы «Ақмола», Қызылорда облысындағы «Қараөзек» және Батыс Қазақстан облысындағы «Үлкен Өзен» су қоймалары. Қазіргі уақытта осы үш жоба бойынша да конкурстық рәсімдер жүргізіліп жатыр.

• 14.09.2026
• 6