Finance Chess Cup: қаржы қауымдастығын біріктіретін дәстүр

30–31 қазанда Астанада Finance Chess Cup – 2026 екінші жыл қатарынан ұйымдастырылған салалық шахмат турнирі өтті. Оған мемлекеттік органдардың, қаржы институттарының және квазимемлекеттік сектор ұйымдарының өкілдері қатысып, турнир спорттық бәсекемен қатар кәсіби қарым-қатынас алаңына айналды.

Өткен жылы бастау алған бастаманың биыл да жалғасын тапқаны ерекше қуантады. Қатысушылар саны артып, турнир қаржы қауымдастығының маңызды іс-шараларының біріне айналып келеді. Мұндай формат әріптестердің бір-бірін жақынырақ тануына, тәжірибе алмасуына, ведомстволар мен ұйымдар арасындағы өзара байланысты нығайтуға мүмкіндік береді.

Жарыс қорытындысы бойынша ауыспалы кубокты Шымкент қаласы бойынша Мемлекеттік кірістер департаментінің командасы жеңіп алды. Екінші орынды Қаржы министрлігінің Мемлекеттік кірістер комитетінің командасы, үшінші орынды Түркістан облысының командасы иеленді.

Шахмат стратегиялық ойлауды, дәл есептеуді, сабырлылықты және әрбір қабылданған шешім үшін жауапкершілікті талап етеді. Бұл қасиеттер қаржы саласының мамандары үшін аса маңызды. Өйткені біздің жұмысымыз да жүйелі талдауды, тәуекелдерді бағалай білуді және қабылданған шешімдердің ұзақ мерзімді салдарын болжауды қажет етеді.

Біз Finance Chess Cup турнирін одан әрі қолдап, жаңа командалардың қатысуына жағдай жасауды жалғастырамыз. Турнир әріптестерді біріктіретін, командалық мәдениетті нығайтатын және жұмыс кабинеттерінен тыс кәсіби қарым-қатынас орнатуға мүмкіндік беретін тұрақты жыл сайынғы дәстүрге айналады деп сенемін.

Жеңімпаздар мен жүлдегерлерді құттықтаймын! Барлық қатысушыларға тартысты ойын, жеңіске деген жігер және қарсыластарына деген құрмет үшін алғыс білдіремін. Finance Chess Cup турниріне одан әрі даму, жарқын партиялар мен жаңа жетістіктер тілеймін!

• 02.11.2026
• 12