Құрметті жерлестер!

Бүгін ZOOM платформасында облысымыздың денсаулық сақтау жүйесінің ықтималды түрде COVID-19 індетінің күрт өскен жағдайға дайындығы талқыланды. Жалпы, Шығыс Қазақстан соңғы үш ай көлемінде жасыл аймақ шеңберінен шыққан жоқ. Десе де, осы уақытқа дейін өңірде 23 мыңнан астам коронавирусты жұқтыру жағдайы тіркелді.

Стационарлардағы науқастар жатқан төсек орын қоры бүгінде 4,5% құрайды. Жалпы, қазіргі таңда облыс аумағында 3544 инфекциялық төсек орын бар, оның 319-ы реанимациялық. "D" жұмыс жоспарына сәйкес жүргізіліп жатқан дайындық шаралары қажет болған жағдайда инфекциялық төсек орын санын 6 мыңға дейін ұлғайтуға мүмкіндік береді.

Бұдан басқа, облыс бойынша 67 – рентген-аппараты, 1 142 – оттегі концентраторы бар, сондай – ақ 24 – оттегі станциясы орнатылды, 368 – ӨЖЖ аппараты, 18 – компьютерлік томограф, жалпы қуаттылығы тәулігіне 13,9 мың зерттеуді құрайтын 22 – ПТР зертханасы жұмыс істейді. Жеке қорғаныс құралдарының да толық қоры бар.

Өскемен, Семей қалалары, сондай-ақ Алтай, Аягөз және Үржар аудандары бойынша КТ-зерттеу жүргізу алгоритмі жасалды. ПТР-зертханаларының бірыңғай желісінің оңтайлы жұмыс кестесі мен 24/7 режиміндегі кезек тәртібі жасалды.

Айта кетейін, бүгінгі күні вакцинаның бірінші компонентін 9 457 шығысқазақстандық алды, ал ревакцинациядан 5 118 адам өтті. Қазір егу пункттерінің санын арттыру бағытында жұмыстар жүргізілуде. Бір апта ішінде облыстың ірі кәсіпорындары мен сауда орталықтарында қосымша 60 вакцинация пунктін ашу тапсырылды. Алдағы уақытта тағы 40 орын ашылатын болады.

• 09.04.2021
• 319