46 МЫҢ ТҰРҒЫНЫ БАР АУЫЛДА АЛҒАШ РЕТ МӘДЕНИЕТ ҮЙІ САЛЫНЫП ЖАТЫР

Жаңаөзен қаласына қарасты Рахат елдімекені күн санап көркейіп келеді. 46 мың адам қоныстанған ауылда бүгінде бірнеше нысан құрылысы мен әрлеу жұмыстары жүруде. 

Рахат елдімекенінде алғаш рет 300 орындық мәдениет үйі салынып жатыр. Ш пішіндес нысанның бір бөлігін тұтасымен 300 орындық көрермен залы алып жатыр. Орта бөлігі ұжым қызметкерлеріне арналса, екінші бөлігінде бір мезетте 45 адамды қабылдайтын кітапхана да орналасады. Кітап қорында 12-14 мың әдеби оқулық болады деп жоспарлануда.  Екі қабатты ғимараттың жоғары қабатындағы бөлмелер эстрада және театр өнері, бейнелеу тағы басқа үйірмелерді өткізуге жабдықталады.  Нысан іске қосылғанда 32 жаңа жұмыс орны құрылады. Бүгінде құрылыс басында 60-тан астам жергілікті азамат жұмыс істеп жүр. Құрылыс жұмыстарының 80 пайызы аяқталған. Мамыр айының аяғына дейін толық аяқтап, пайдалануға беру жоспарлануда.

ДӘРІГЕРЛІК АМБУЛАТОРИЯ САЛЫНАДЫ

Сонымен қатар, жуық арада Рахат ауылында бір ауысымда 50 адамды қабылдайтын дәрігерлік амбулатория салынбақ. Сондай-ақ екі қабатты спорт кешенін тұрғызуға әзірлік басталды. Әлеуметтік нысандар іске қосылған соң 40 астам адам тұрақты жұмыспен қамтылады.

Маңғыстау облысы әкімінің баспасөз қызметі

• 12.04.2021
• 229