МАҢҒЫСТАУ ОБЛЫСЫНДА МОНИТОРИНГТІК ТОПТАРДЫҢ ЖҰМЫСЫ КҮШЕЙТІЛЕДІ

Бұл туралы Маңғыстау облысы Қоғамдық коммуникация орталығында өткен брифингте Ақтау қалалық санитариялық-эпидемиологиялық бақылау басқарманың басшысы Әсима Жарылғасова мәлім етті. 

«Маңғыстау өңірі сары аймаққа енуіне байланысты облыс орталығы Ақтау қаласында мониторингтік топтың жұмысы күшейтілуде. Қала әкімінің бекітілген өкіміне сәйкес, жергілікті полиция қызметкерлерімен бірлесіп, санитарлық-эпидемиологиялық талаптарды сақтау мақсатында кәсіпкерлік объектілеріне мониторинг жұмыстары жалғасып жатыр. Мәселен жыл басынан бері Ақтауда 110 рейдтік іс-шара өткізілді. 868 кәсіпкерлік нысан (кафе, супермаркеттер, дәріханалар, ойын-сауық орталықтары тексерілді. 161 нысанға санитарлық режимді бұзғаны үшін акт толтырылды. Кәсіпкерлік объектілерінің қызметкерлерінен түсініктеме алынды және түсіндіру жұмыстары жүргізілді»,-деді Әсима Жарылғасова. 

Мамандар халық арасында коронавирустық инфекциямен ауыратындар санының өсуіне байланысты бетперде тағып, ара-қашықтықты сақтауға, адам көп шоғырланған орындарға бармауға шақырады. 

«Бүгінгі таңда халық арасында коронавирустық инфекциямен ауыратындар санының өсуі күн сайын байқалуда.  Әкімдіктің мониторинг тобы күнделікті Маңғыстау облысының бас санитар дәрігерінің қаулысы бойынша көрсетілген талаптардың орындалуын сақтау мақсатында мониторинг жұмыстарын жүргізіп жатыр. Негізгі назар түнгі сағат 00:00-ден кейін жұмыс істейтін және адамдар көп жиналатын, әлеуметтік қашықтық пен бетперде режимін сақтамайтын мейрамханаларға және ойын-сауық орындарына аударылды. Жыл басынан бастап бүгінгі күнге дейін 7 нысанға айыппұл салды.  Барлық материалдар жиналып, тиісті шаралар қабылдау үшін үйлестіру орталығы мен санитариялық-эпидемиологиялық бақылау басқармасына жіберілді. Коронавирустық инфекцияның таралуына қарсы шаралар бойынша сауда, бизнес орталықтарының, супермаркеттердің басшыларына түсіндіру жұмыстары жүргізіліп, ұсыныс берілді»,-деді Ақтау қалалық кәсіпкерлік және ауыл шаруашылығы бөлімінің басшысы Тілеген Едігеев.

• 12.04.2021
• 151