Шығыс Қазақстан облыстық сәулет-этнографиялық және табиғи-ландшафтық мұражай қорығында болдым

Қолданыстағы шағын зообақ негізінде Өскеменде ландшафты зооботаникалық парк құру жөніндегі жаңа жобаны іске асыру жоспарымен таныстым.

Қазіргі уақытта облыс орталығындағы хайуанаттар бағының экспозициялары өте аз аумақты алып жатқанын білеміз. Шамамен 1 га құрайды. Мамандардың айтуынша, келушілердің 70%-ы саябаққа осы жануарларды көру үшін келеді екен. Сондықтан хайуанаттарға әлемдік үлгілерге сай келетін орта мен жақсы жағдай жасау аса маңызды.

Айта кету керек, сол жағалаудағы саябақ кешенінің ішінде осындай саябақ жабдықтау үшін қолайлы аумақ бос жатыр. Ең бастысы, бізде жануарлардың табиғи мекеніне сай келетін экспозициялар жасау үшін барлық жағдай бар. Қалай дегенмен, ШҚО алуан түрлі фауна мен флорасы бар бірегей өңір.

Бүгінгі таңда елде мұндай бағытта жұмыс істейтін хайуанаттар бағы жоқ. Ал саябағымыздағы тиісті дәрежедегі инфрақұрылым бұл жұмысты біршама жеңілдететіні сөзсіз.

Біздің мамандар Ресей мен Еуропаның бірқатар хайуанаттар бағының жұмысымен танысты. Германиядағы Берлин және Гамбург зоопарктеріне, Стокгольмдағы "Skansen" және Швециядағы "Nordens Ark", сондай-ақ Финляндиядағы "Korkeasaari" болды.

Өзара тәжірибе алмасу және халықаралық қауымдастықтармен бірлескен жұмыс алдағы жылдары өңір үшін тың жобаны іске асыруға көмектеседі деп сенемін. Айта кету керек, ЖСҚ әзірлеу және вольерлік кешендерді жобалау процесіне тәжірибелі халықаралық сарапшылар – зооархитекторлар тартылды.

Биыл, сондай-ақ этноауылдың орталық бөлігін қайта жөндеуден өткізетінімізді атап өткім келеді. Жидебайда тұрған Абай музей-үйінің көшірмесін жасаймыз. Саябақта бұған дейін ғимараттың өзі бой көтерген-ді. Жақын арада мамандар ішкі бөлігін жабдықтауға кіріседі. Барлық экспозициялар көшірмесі түпнұсқаларынан айнытпай жасалады. Осылайша, балаларымыз бұдан былай Абайдың Өскемендегі шағын мұражайына да бара алатын болады.

• 19.04.2021
• 371