С.ТРҰМОВ ҮКІМЕТ ОТЫРЫСЫНДА ЭПИДЕМИОЛОГИЯЛЫҚ ЖАҒДАЙ ЖАЙЫНДА БАЯНДАМА ЖАСАДЫ

Бүгін ҚР Премьер-Министрі А.Маминнің төрағалығымен өткен Үкімет отырысында Маңғыстау облысының әкімі С.Трұмов өңірдегі санитарлық-эпидемиологиялық жағдай жайында баяндады.   
Маңғыстау облысы жыл басынан «жасыл аймақта» болып, 9 сәуірден бастап «сары аймаққа» енді. Соңғы тәулікте 29 адамнан COVID-19 вирусы анықталды.  Қазіргі таңда тұрғындарға 432 инфекциялық және 54 реанимациялық төсек орындық 11 стационар қызмет көрсетіп жатыр. Осы стационарларда бүгінгі күні 184 адам, оның ішінде реанимацияда 14 адам ем қабылдауда (5 адам – өте ауыр жағдайда). Төсек орындардың толымдылығы – 42%-ды құрайды. Қажет болған жағдайда қосымша 2 452 төсек орын, 131 реанимациялық орын толығымен жабдықталып, резервте дайын тұр.
Коронавируске қарсы вакцинация жұмыстары жалғасуда. Екпе жұмыстарын жүргізуге 417 медицина қызметкері аттестациядан өтіп, дайындалды. Өңірде 15729 адамға «Спутник V» вакцинасы егілді. Облыс бойынша вакцинациялауға арналған 28 егу кабинеті және ірі өндіріс орындары мен әлеуметтік нысандарда 3 жылжымалы егу пункттері ашылды («МАЭК КазАтомпром», ТРК «Ақтау», «Достық үйі»).
Мониторингтік топтардың жұмыстары күшейтілді. 24 мониторингтік топпен және полиция қызметкерлерімен жыл басынан бері барлығы  2348 рейдтік шаралар жүргізілді. Нәтижесінде, 95 карантин талаптарын бұзушылықтар анықталып, 19 хаттама толтырылды.
Маңғыстау облысының аумағында 17 сәуірден бастап карантиндік шектеу шараларын күшейту бойынша облыстың бас мемлекеттік санитарлық дәрігерінің қаулысы қабылданды. Қаулыға сәйкес той, ас (садақа), еске алу шараларын өткізуге тыйым салынды. 

Маңғыстау облысы әкімінің баспасөз қызметі

• 20.04.2021
• 187