МАҢҒЫСТАУ ОБЛЫСЫ АУЫЛДАРДЫҢ ДАМУ КӨРСЕТКІШІ БОЙЫНША ҮЗДІКТЕР ҚАТАРЫНД

Бүгін ҚР Премьер-Министрі Асқар Маминнің төрағалығымен өткен Үкімет отырысында ауылдық жерлерде тұрмыс деңгейін арттыру мәселелері қаралды. Ауылда өмір сүру сапасын жақсарту бойынша атқарылып жатқан жұмыстар туралы ұлттық экономика министрі Әсет Ерғалиев  баяндама жасады. «Nur Otan» партиясының сайлауалды бағдарламасын іске асыру аясында даму әлеуеті жоғары 3,5 мың ауылды ауқымды жаңғырту жұмыстары жүргізіліп жатыр, онда ауыл халқының 87%-ы тұрады, бұл – шамамен 7 млн адам. 
Министрдің айтуынша, ауылдық елді мекендердің әлеуметтік және т.б. өмір сүруге қажетті нысандармен (қызметтермен), инфрақұрылыммен қамтамасыз етілуі 2020 жылы республика бойынша – 60,3% құрады. Ең жоғарғы көрсеткіштер Павлодар (73,6%), Маңғыстау (68,5%), Солтүстік Қазақстан (65,7%) облыстарында байқалады. 
Айта кету керек, өңірлерді табиғи газбен қамту бойынша да Маңғыстау жоғары көрсеткішке ие. Облыстың 99% көгілдір отын барып тұр. 
Ауылдарда өмір сүру деңгейін одан әрі арттыру үшін Министрлік «Ауыл – Ел бесігі» жобасын іске асыру бойынша жоспарлы жұмыстар жүргізіп жатыр.  Бірінші кезекте, ауыл тұрғындарының тұрмыс сапасын арттыру үшін инфрақұрылымды жаңғырту жұмыстары жасалуда. 2025 жылды қоса алғанда, жергілікті маңызы бар 27 мың км жол салынып, жөнделеді. Ауылдарда 24 млн шаршы метр тұрғын үй пайдалануға беріледі. АӨК саласында 500 мың жұмыс орнын құрумен 845 жоба, 350 мың фермерлік және үй шаруашылықтарын тартумен 7 экожүйе жүзеге асырылатын болады. Қабылданып жатқан шаралар 1 млн ауыл тұрғынының табысын арттыруға мүмкіндік береді. Ауыл тұрғындарының 100%-ы сапалы ауыз сумен, 60%-ы табиғи газбен қамтамасыз етіледі. 
Маңғыстау облысы әкімінің баспасөз қызметі

• 20.04.2021
• 294