С.ТРҰМОВ: «ЕЛДЕ ІНДЕТ КҮШЕЙІП, ҚАРАЛЫ ХАБАР КӨБЕЙДІ, АЛ БІЗ ТОЙ ТОЙЛАУДЫ ТОҚТАТАР ЕМЕСПІЗ. БҰЛ БАРЫП ТҰРҒАН «ҚЫЛМЫС»

Өткен тәулік бойынша Маңғыстау облысында 80 адамнан коронавирус инфекциясы анықталды. Оның  34-і Ақтау қаласы, 19-ы Мұнайлы ауданы, 10-ны Маңғыстау  ауданы, 4-і Жаңаөзен қаласы, 2-і  Бейнеу  ауданы, 6-ы  Түпқараған ауданы, 5-і Қарақия аудандарының тұрғындары. Науқастардың ішінде 35-і симптомды, 45-і симптомсыз белгісімен емделуде. Бұл туралы бүгін аппараттық жиында облыс әкімінің орынбасары Гүлмира Қалмұратова мәлімдеді. 
Облыс әкімі орынбасарының айтуынша бүгінгі күні денсаулық сақтау нысандары штаттық режимде жұмыс істеп жатыр. Науқастарға 432 инфекциялық және 54 реанимациялық төсек орындық 10 стационар қызмет көрсетуде. Алғашқы медициналық-санитарлық көмек көрсетуге 92 мобильдік бригада мен  53 жедел-жәрдем бригадасы жұмылдырылған. Оларға 12-18 cәуір аралығында 4171 шақырту түскен. 
«Дәрі-дәрмек және жеке қорғану құралдарымен қамту мәселесі де басты назарда. Медициналық мекемелер мен дәріханаларда 3 айға жететін дәрі-дәрмек қоры жасақталған. Сонымен қатар медициналық ұйымдар қажетті жабдықтармен толық көлемде қамтылды. Облыс бойынша 1 жылжымалы және 10 зертханалық орталық бар.Олар 1 тәулікте орташа есеппен 1 687 аса ПЦР тәсілімен тестілеу өткізіледі»,-деді Г.Қалмұратова.
Облыс бойынша КВИ-ге қарсы екпе салатын 28 кабинет жұмыс істеп тұр. Олар апта бойы демалыссыз тұрғындарды қабылдауда.  
Аймақта кәсіпкерлік нысандары мен тұрғындардың карантин талаптарының сақталуын бақылау бойынша 24 мониторингтік топ жұмыс жасайды. Жыл басынан бері олармен барлығы 2320 рейдтік шаралар жүргізілді. Нәтижесінде 94 карантин талаптарын бұзушылық анықталып, 19 хаттама толтырылды. 
Облыс әкімі С.Трұмов осы салаға жауапты орынбасарына коронавирусқа қарсы шараларды күшейтуді тапсырды. Үйде Covid-тың симптомсыз түрімен емделіп жатқан науқастарды қатаң бақылауға алып,  мониторингтік топтың жұмысын күшейту керектігін айтты. «Елде індет күшейіп, жағдай қиындап жатыр, қаралы хабар көбейді, ал біз той тойлауды тоқтатар емеспіз. Бұл барып тұрған «қылмыс». Тойды тоқтату керек. Мониторинг жұмыстарын күшейтіңіздер»,- деді обыс әкімі.  

ОБЛЫС ХАЛҚЫНЫҢ 60% АУЫЛДА ТҰРАДЫ
  Маңғыстау облысында 58 ауылдық елді мекен бар, оның ішінде 28 ауыл перспективалық елді мекен ретінде анықталған. Бүгінгі күні 58 ауылдық елді мекенде 433 407 адам тұрады немесе облыс халқының 60%-ы. Соңғы 10 жылда ауылдық елді мекендердегі халық саны 183 мыңға артты немесе 73%-ға өсті. Бұл туралы экономика және бюджеттік жоспарлау басқармасының басшысы Марина Альбекова айтыр берді. 
Ауыл тұрғындарының өмір сүру сапасын арттыру мақсатында  облыс көлемінде «Ауыл – Ел бесігі» арнайы жобасы жүріп жатыр. Жоба өңірдің тірек елді мекендерін қажетті инженерлік инфрақұрылыммен және әлеуметтік нысандармен қамтамасыз ету көзделген. Яғни, автомобиль жолдарын салу, жөндеу және білім беру, мәдени және спорттық нысандар салу, сонымен қатар жаңа жұмыс орындарын құру арқылы ауылдардың инфрақұрылымын жаңартуды жетілдіреді.
Бүгінге «Ауыл – Ел бесігі» жобасына даму үшін потенциалы бар және халық саны көп 28 перспективалы ауылдық елді мекен енгізілді. 
2019-2020 жылдары 63 жобаға 5,3 млрд.теңге бөлінді. Жоба аясында 8 ауыл қамтылды (Бейнеу, Ақшұқыр, Маңғыстау, Қызылтөбе, Баянды, Басқұдық, Рахат, Шетпе).
Оларға 8 әлеуметтік инфрақұрылым, 8 тұрғын үй-коммуналдық шаруашылық объектілер және көлік инфрақұрылымының жалпы ұзындығы 145,2 км болатын 47 объектісіне жөндеу жұмыстары жүргізілді. Нәтижесінде  57 жоба аяқталып, 6 жоба 2021 жылға өтті. 
Осылайша өңірдегі жалпы ауылішілік жолдардың қатты жабындымен қамтамасыз етілуі 24,5%-дан 27,8%-ға өсіп, 252 уақытша және 9 тұрақты жұмыс орындары құрылды, 351 млн.теңге салық түсті.
Биылға жоспар бойынша 15 жобаға (2021 жылға өтпелі - Ақшұқыр ауылында 160 орындық дене шынықтыру-сауықтыру кешені) 1 586 млн.теңге қарастырылды. Жобаға Сайын Шапағатов және Жетібай ауылдары таңдалды.

• 20.04.2021
• 288