Облыс әкімі сыбайлас жемқорлыққа қарсы аймақтық комиссияның отырысына қатысты

Ақтөбе облысының әкімі Оңдасын Оразалиннің төрағалығымен сыбайлас жемқорлыққа қарсы іс-қимыл мәселелері жөніндегі аймақтық комиссияның  кезектен тыс отырысы болып өтті. 
Жиынға облыс әкімінің орынбасарлары, облыстық мәслихат хатшысы, құқық қорғау органдары және жауапты басқармалардың басшылары қатысты.
Отырыс барысында Сыбайлас жемқорлыққа қарсы іс-қимыл агенттігінің облыстық департаменті басшысының бірінші орынбасары Ғалымбек Досанов Сыбайлас жемқорлыққа қарсы 2015-2021 жылдарға арналған стратегияның 2018-2025 жылдарға көзделген іс-шаралар жоспарының орындалу барысы туралы баяндама жасады. 
Ғалымбек Досановтың мәліметінше, департамент жанынан құрылған «Арнайы мониторингтік топтың» жүргізген талдау жұмыстарының қорытындысы бойынша 2018-2020  жылдарға арналған  Сыбайлас жемқорлыққа қарсы стратегияның негізгі іс-шараларын жергілікті атқарушы органдардың толықтыруы мен орындалуының сапасы тексерілді. Талдау барысында бірнеше облыстық басқармалар мен аудан әкімдіктерінде стратегияны орындау жоспарының уақытылы бекітілмеуі және орындалмауы туралы кемшіліктер байқалған. Осыған орай, аудан әкімдіктері мен облыстық басқармаларға жіберілген кемшіліктерді жою үшін жұмыстар жүргізу ұсынылды.  Жиын соңында аймақ басшысы Оңдасын Оразалин облыс әкімінің бірінші орынбасары Нұржауған Қалауовқа жауапты сала басшылары мен аудан әкімдіктері тарапынан кеткен кемшіліктер бойынша жұмыс жүргізуді және алдын алу бағытында ұдайы бақылауда ұстауды тапсырды.

• 21.04.2021
• 264