ОБЛЫСТЫҚ АРДАГЕРЛЕР КЕҢЕСІНІҢ КЕЗДЕСУІ ӨТТІ

Жиынға  «Ардагерлер ұйымы» республикалық ҚБ төрағасы Б.Ізмұхамбетов қатысты

Бүгін  Маңғыстау облысы ардагерлер кеңесінің VIII конференциясы өтті. Онлайн форматта ұйымдастырылған алқалы жиынға «Ардагерлер ұйымы» республикалық қоғамдық бірлестігінің басқарма төрағасы Б.Ізмұхамбетов арнай келді және облыс әкімі С.Трұмов қатысты. Күн тәртібінде облыстық ардагерлер ұйымының 2016-2020 жылдар аралығындағы есебі баяндалып, ардагерлер кеңесінің жаңа құрамы, тексеру комиссиясының мүшелері және республикалық ардагерлер ұйымының съезіне делегаттар сайланды.
Облыста 2 қалалық және 5 аудандық ардагерлер ұйымы жұмыс істейді. Жыл басында тіркелген  жалпы ардагерлер саны 51705. Бастауыш ұйымдарының саны – 105. Облыстық ардагерлер ұйымының төрағасы С.Төлетовтың айтуынша, жергілікті биліктің қолдауымен Ақтау қаласында, Түпқараған, Маңғыстау, Қарақия, Мұнайлы аудандарында «Ардагерлер үйі» жаңартылып, жөндеуден өтіп, телефон, интернет желілері орнатылды. Облыстық ардагерлер кеңесі жаңадан салынған «Халық Ассамблеясы ғимаратына көшіріліп, жиһаз, қажетті құралдармен  қамтамасыз етілген. «Ел Тәуелсіздігінің 30 жылдық тарихына үлес қосқан, әр салада еселі еңбек еткен ардагерлеріміз туралы мәліметтерді жинақтап, олардың өнегелі өмір  тәжірибелерін насихаттау жас  ұрпаққа  тәрбие  беруде маңызы зор. Осы бағытта жұмыстар жасалып жатыр»,-деді С.Төлетов.   
Жиын барысында сөз алған облыс әкімі С.Трұмов еліміздің егемендік алып, алғаш қадамын жасаған шағында мемлекет үшін елеулі еңбек етіп, бүгінгі таңда да елдің тыныс-тіршілігінен қалыс қалмай үлесін қосып келе жатқан өңір ақсақалдарына алғысын жеткізді. 
«Ертеден жалғасып келе жатқан көрегенділігіміз бен тектілігіміздің, елдік ерен қасиетіміздің түп тамыры – елдіктің шаңырағын тіктеу, ауызбіршілік, ынтымақ пен өзара сыйластықта екені даусыз. Алдыңғы буын ағалар мінсіз кісілік қасиетімен, тағылымға толы өнеге-өсиетімен ұрпаққа үлгі көрсетіп келе жатыр. Сіздер шеккен ауыртпалығы мол ғұмыр, сіздер шыққан асқар биік тұғыр біздің елдігіміздің, ұлттық құндылығымыздың айнасы, бағдаршамы іспетті. Биыл, Тәуелсіздігіне 30 жыл толып отырған еліміздің өскелең ұрпағы, жалынды жастар сол бағдаршамға қарай бағыт түзеп, арман-мұратымызды ары қарай жалғай береді деген сенімдеміз»,- деді облыс әкімі.
«Ардагерлер ұйымы» республикалық ҚБ төрағасы Б.Ізмұхамбетов Маңғыстау ардагерлер кеңесінің жұмысына оң бағасын берді. «Республика бойынша елеулі жұмыс жасап жатқан үш аймақ бар. Соның бірі – Маңғыстау»,-деді Бақтықожа Салахатдинұлы. Жиын соңында Б.Ізмұхамбетовтың ұсынуымен Маңғыстау облысының ардагерлер кеңесінің алдағы 5 жылға жаңа төрағасы болып Серікбай Төлетов сайланды.

• 27.04.2021
• 191